चितवन । जिल्लाको इच्छाकामना गाउँपालिकाको माथिल्लो भेगमा बौलाह कुकुरको आतंक मच्चिएको छ। बौलाह कुकुरले टोक्दा २५ जना घाइते भएका छन्। गाउँमा हिँडिरहेका मानिस एकाएक कुकुरको आतंकबाट भागाभाग नै भए । अन्यत्र गाउँबाट आएको कुकुरले गाउँमा भेटेका जतिलाई टोक्न थालेपछि गाउँ नै त्रसित बन्यो । अगाडि भेटिनेलाई कुकुरले टोक्दै जानेक्रममा २५ जना घाइते भएका छन् । तीमध्ये दुईजना अघिल्लो दिनमा घाइते भएका हुन् ।

उनीहरु आफन्तको घरमा आएका थिए । बाँकी २३ जनालाई मंगलबार टोक्दै घाइते बनाएको थियो । इच्छाकामना गाउँपालिका वडा नम्बर ३ को माझगाँउ, नागदह, ढाप, चिसापानीमा कुकुर आतंक भएको हो । घरमा काम गरिरहेका र बाटोमा हिँडिरहेका बेला कुकुरले टोकेको हो । इच्छाकामना गाउँपालिकाका विज्ञको टोली तुरुन्तै उक्त गाउँ पुगेर उद्धार गरेका थिए । घाइतको उपचारसँगै रेविजको खोप लगाइएको थियो । २५ मध्ये २२ जना जटिल घाइते भएका थिए । उनीहरुलाई युरोग्लोविनको खोप पनि लगाइएको छ ।

पाँचजनालाई थप उपचारका लागि भरतपुर अस्पताल पठाइएको गाउँपालिकाका स्वास्थ्य शाखा प्रमुख बासुदेव सापकोटाले बताए । ‘मान्छे भट्यो कि टोकिहाल्ने , गाउँभरी टोक्दै टोक्दै हिँडेपछि हामी लगत्तै हामी गाउँ पुगेर कुकुर नियन्त्रणमा लाग्यौं ,’ उनले भने , ‘सबैतिर समन्वय गरेर घाइतेको उपचार गर्यौं । ’कुकुरलाई नियन्त्रणमा लिएर मारिएको छ ।