रौतहट । कुमार चन्दन । भ्रमणमा निस्केका गरुडाका एक बेपारीको यातायातको ठक्करले मृत्यु भएको हो । रौतहटको आर्थिक नगरी गरुडा बजारका एक बेपारी प्रातः भ्रमणमा सोमबार बिहान जाँदा अज्ञात सबारी साधनको ठक्करले मृत्यु भएको हो । गरुडा नगरपालिका ४ का ४८ वर्षीय गल्ला व्यवसायी राजनारायणको मृत्यु भएको हो । एकाबिहानै अँध्यारो छँदै सधैँ प्रातः भ्रमणमा निस्कने साहलाई इलाका प्रहरी कार्यालय गरुडादेखि उत्तरतिर सडकमा अज्ञात सबारी साधनले ठक्कर दिएको थियो । बेहोस अवस्थामा प्रहरीले उद्धार गरी प्रादेशिक अस्पताल पुरयाउँदा चिकित्सकले बेपारी साहलाई मृत घोषणा गरेका थिए ।

प्रहरीले मृत्युकाे कारण अझै स्पष्ट खुलाउन सकेकाे छैन। गरुडा नगर उद्योग बाणिज्य संघको अध्यक्ष हरेन्द्र चौधरीकाे नेतृत्वमा व्यावसायीहरु तथा स्थानीयहरु घटना बारे स्पष्ट र निष्पक्ष छानबिन हुनुपर्ने माँग गर्दै दिनको २ बजे सम्म धर्नामा उत्रिएका थिए।

आफन्तलाई जानकारी नगराई बेपारी साहलाई गौर अस्पतालमा पु¥याएको तथा ठक्कर दिने सबारी साधन र चालकलाई प्रहरीले नियन्त्रणमा लिन नसकेको भनी आफन्तहरुको सहभागितामा गरुडा बजार व्यावसायीहरुले बन्द गराएका थिए । बिच सडकलाई नै अवरुद्ध पारी स्थानीय सबै पसल पनि बन्द गराएका व्यावसायीहरुले ठक्कर दिने सबारी साधन र चालकलाई तत्काल नियन्त्रणमा लिनुपर्ने माग राखेका थिए ।

प्रहरीले मृत्युकाे कारण सडक दुर्घटना भनेपनि समय, स्थान र सवारी साधन बारे रहस्य खुलाउन सकेको छैन। यता घटना बारे प्रहरी अनुसन्धान गरीरहेकाे ईलाका प्रहरी कार्यालय गरुडाका प्रहरी निरिक्षक राजाराम केसरीले बताउनुभयो ।

गरुडा नगरपालिकाका नगर प्रमुख कन्थमनि प्रसाद कलवारसमेतको रोहबारमा इलाका प्रहरी कार्यालय गरुडामा इलाका प्रहरी कार्यालय र पीडित परिवारबिच भएको छलफलपछि अवरुद्ध सडक र पसलहरु संचालनमा आएका छन् । ४८ घन्टाभित्र प्रहरीले ठक्कर दिने सबारी साधन तथा सबारी चालकको बारेमा अनुसन्धान गरी कानुनी दायरामा ल्याउने सहमति भएको नगर प्रमुख कलवारले जानकारी गराएका छन् । सडक अवरुद्ध पारी स्थानीयवासी प्रदर्शनमा उत्रेपछि नेपाल प्रहरी तथा सशस्त्र प्रहरी व्यापक मात्रामा परिचालन गरिएको थियो । दिनभर गरुडाको अवस्था तनावग्रस्त रहे पनि साँझदेखि यातायात तथा व्यवसाय संचालनमा आएका छन् ।