वीरगंज । प्रतिनिधिसभा र प्रदेशसभा सदस्य निर्वाचनमा बारा जिल्ला नेपाली कांग्रेसविहीन बनेको छ । बाराले कांग्रेसका दुई सहमहान्त्री पाएको छ । थारु कोटाका सहमहामन्त्री उमाकान्त चौधरी बारा निर्वाचन क्षेत्र नम्बर–१ बाट पराजित भए । मुस्लिम कोटाका सहमहामन्त्री फर्मुल्लाह मन्सुर समानुपातिकतर्फको बन्दसूचीमा छन् । तर, बारा प्रदेश र प्रतिनिधिसभा दुवैतर्फ कांग्रेसविहीन बनेको छ । प्रतिनिधिसभातर्फ चार क्षेत्र भएको बारामा प्रदेशसभाका आठ क्षेत्र छन् । तीमध्ये कांग्रेस उमेदवार एक ठाउँबाट पनि निर्वाचित हुन सकेनन् । प्रतिनिधिसभातर्फ कांग्रेसले बारा–१ बाहेक कतै पनि उमेदवारी दिएको थिएन । नेताहरूले नै तीन क्षेत्र छोडेको बारामा एउटा क्षेत्र जनताले कांग्रेसविहीन बनाइदिएका छन् । नेता कृष्णप्रसाद सिटौला समूहबाट कांग्रेस संस्थापन टिममा पुगेका उमाकान्त चौधरीले आफ्नो टिकटका लागि मात्र काम गरेपछि कांग्रेसका भोटरहरूले नै उनलाई हराउन मुख्य भूमिका निर्वाह गरेको हुन सक्ने स्थानीयको विश्लेषण छ । प्रदेशसभाका आठ निर्वाचन क्षेत्र पनि कांग्रेसविहीन बनेको छ ।

कांग्रेसले बारा–१ मा प्रतिनिधिसभासँगै प्रदेशसभाका दुवै निर्वाचन क्षेत्रमा आफ्नै उमेदवार उठाएको थियो । तर, प्रतिनिधिसभामा सहमहामन्त्री चौधरीसँगै प्रदेशसभाका उमेदवारहरू ‘क’का रमेशप्रसाद दंगाल र ‘ख’का नगेन्द्रप्रसाद कानु दुवै पराजित भएका छन् । तीन क्षेत्रमै हार्दा बारा–१ कांग्रेसविहीन बनेको छ । बारा–२ प्रतिनिधिसभा निर्वाचन क्षेत्र कांग्रेसले नेकपा (माओवादी केन्द्र)का शिवचन्द्रप्रसाद कुशवाहलाई छोडेका थियो । त्यहाँबाट कुशवाह नै निर्वाचित भएका छन् । बारा–२ ‘क’मा कांग्रेसले उमेदवार उठाएको थिएन । बारा–२ ‘ख’मा कांग्रेसले उमेदवार बनाएका संविधानसभा सदस्य समेत भइसकेका रामअयोध्याप्रसाद यादव जनता समाजवादी पार्टी (जसपा)का बच्चा राउत अहिरसँग पराजित भएपछि बारा–२ पनि कांग्रेसविहीन बनेको छ । बारा–३ पनि कांग्रेसले लोकतान्त्रिक समाजवादी पार्टी (लोसपा)लाई छोडेको थियो । कांग्रेसले निर्वाचन क्षेत्र नै छोडेपछि कांग्रेसका पूर्वजिल्ला सभापति तथा संविधानसभा सदस्य लालबाबुसिंह भूइहार पार्टी नै छोडेर लोसपाको उमेदवार बनेका थिए । तर, यो निर्वाचन क्षेत्रमा माओवादी केन्द्र छोडेर नेकपा (एमाले)बाट उमेदवार बनेकी ज्वालाकुमारी साह निर्वाचित भएकी छन् । प्रदेशतर्फ बारा–३ ‘क’मा कांग्रेसले उमेदवारी नै दिएको थिएन । बारा–३ ‘ख’ मा कांग्रेसका जयचन्द्रप्रसाद चौरासिया तेस्रो नम्बरमा परेर पराजित भएका छन् । बारा–४ मा प्रतिनिधिसभा सदस्यमा कांग्रेसले नेकपा (एकीकृत समाजवादी)का उमेदवार कृष्णकुमार श्रेष्ठ किसनलाई समर्थन जनाएको थियो । प्रतिनिधिसभामा यसरी उमेदवारविहीन बनेको कांग्रेस बारा–४ का ‘क’ र ‘ख’ दुवै प्रदेश निर्वाचन क्षेत्रमा कांग्रेसले उमेदवारी नै दिएका थिएन ।

कांग्रेस बाराका सभापति राजेश राय यादव पूरै जिल्ला कांग्रेस जनप्रतिनिधिविहीन हुनुमा धेरै कुरा रहेको भन्दै त्यसको समीक्षा आन्तरिक रूपमा गरिने बताउँछन् । उनी सार्वजनिक टिप्पणी नगर्ने भन्दै आन्तरिक समीक्षामा आफूले आवश्यक कुरा राख्ने बताउँछन् । कांग्रेस बाराका सचिव राजेश रौनियार भने बाराबाट प्रतिनिधित्व गर्ने कांग्रेसका दुई सहमहामन्त्रीले कांग्रेसलाई ‘पत्तासाफ’ गराएको बताउँछन् । “एकजना सहमहामन्त्रीले जिल्लामा कांग्रेस जोगाउनेभन्दा आफू मात्र टिकट लिएर नेता बन्ने प्रयास गरे,” सचिव रौनियारले बाह्रखरीसँग भने, “क्षेत्र नम्बर–१ मा उमाकान्तजीले पकेटबाट प्रदेशका उमेदवार छान्नुभयो । कांग्रेसमा लामो समय काम गरेका कार्यकर्ता पाखा लगाएर उहाँले पैसावाललाई छान्नुभयो । त्यसैले तीनवटै क्षेत्र गुम्न पुग्यो ।” उनले अर्का सहमहामन्त्रीले पनि पार्टीका उमेदवारलाई हराउन भूमिका निर्वाह गरेको बताए । “उहाँ आफू समानुपातिकमा बस्नुभयो । उहाँकी निकट मधु शाहीलाई समानुपातिकमा राख्नुभयो । जिल्लामा पार्टीका अरू नेता बन्लान् भनेर उमेदवार नै नबन्ने गरी अरू पार्टीसँग सहमति गर्नुभयो,” रौनियारले भने, “जिल्लाबाट दुई सहमहामन्त्री पाएको बारा जिल्लाले लाभ होइन, घाटा बेहोरेको छ ।” उनले जिल्लाका नेता–कार्यकर्तालाई हराउने वातावरण निर्माण गरेको त्यसको जिम्मा सहमहामन्त्रीद्वयले लिनुपर्ने बताए