एजेन्सी । ‘एनालिटिक्स साइट सेन्सर टावर’ को डाटा अनुसार टिकटक कूल १.५ अर्ब पटक डाउनलोड भइसकेको छ । यस वर्षको फेब्रुअरीमा मात्र टिकटक १ अर्ब पटक डाउनलोड गरिएको थियो जुन गत वर्षको भन्दा ६ प्रतिशत वृद्धि हो । यसरी टिकटक सबैभन्दा बढी भारतमा लोकप्रिय रहेको डाटाले देखाएको छ भने त्यसपछिको यसको दोस्रो ठूलो बजार चीन रहेको छ ।

टिकटक भारतमा मात्र ३१ प्रतिशत डाउनलोड भएको थियो भने चीनमा ११.५ प्रतिशत र अमेरिकामा पनि ८.२ प्रतिशत डाउनलोड भएको डाटामा उल्लेख छ । यस्तोमा टिकटक अहिले फेसबुकका लागि सबैभन्दा ठूलो प्रतिस्पर्धी साबित भइरहेको छ । विशेषगरी युवाहरुमाझ यसको लोकप्रियता बढ्दै गएको छ भने यता फेसबुकको लोकप्रियता चाहिँ घट्दै गएको पाइएको छ । सेन्सर टावरको डाटा अनुसार वाट्सएप र म्यासेन्जरपछि सबैभन्दा बढी डाउनलोड हुने एप टिकटक नै हो जसले अहिले फेसबुक र इन्स्टाग्राम दुवैलाई हराउन सफल भएको छ । यसरी शिर्ष पाँच एप मध्ये टिकटक एउटा मात्र फेसबुकसँग आबद्ध नहुने एपमा पर्दछ ।

टिकटकका लागि भने पहिले देखि नै इन्स्टाग्राम सबैभन्दा ठूलो प्रतिस्पर्धी मानिँदै आएको थियो जसलाई टिकटकले यसवर्ष सजिलै पछि पारेको हो । तर बढी डाउनलोड भएपनि टिकटकलाई अझै इन्स्टाग्राम जति ठूलो स्तरमा पुग्न केही समय लाग्ने बताइएको छ । किनकी २०१८ मा मात्र इन्स्टाग्रामका मासिक एक अर्ब सक्रिय प्रयोगकर्ता थिए जसको सङ्ख्या अहिले अझ बढेको छ भने टिकटकले चाहिँ गत जुनमा मात्र सो उपलब्धी हासिल गरेको हो । यस्तोमा इन्स्टाग्राम अहिले केही अन्तरले मात्र अगाडि रहेको बताइएको छ ।

टिकटकको सफलताबाट प्रभावित भएर फेसबुकले पनि त्यस्तै किसिमको सेवा दिलाउने प्रयास गरिरहेको छ । कम्पनीबाट लिक भएको एक अडियोमा फेसबुकले लासो नामक टिकटक जस्तै भिडियो शेयरिङ एप लन्च गर्ने योजना बनाइरहेको खुलासा भएको थियो । त्यसमा फेसबुकका प्रमुख मार्क जुकरबर्गले मेक्सिको लगायत टिकटको व्यापकता नभएका ठाउँमा सो एप परिचित गराउन सकिने बताएका थिए । त्यस्तै यसअघि बजफिडले पनि २०१६ मा जुकरबर्गले ६ महिनासम्म म्युजिकल्ली खरिद गर्ने प्रयास गरेको रिपोर्ट गरेको थियो । अघिल्लो महिनामा मात्र इन्स्टाग्रामले ब्राजिलमा एउटा नयाँ फिचर परीक्षण गरेको हो जसलाई ‘रिल’ भनिएको छ ।

टिकटक जस्तै फिचर भएको सो एप त्यहाँका बासिन्दामाझ लोकप्रिय भइरहेको पनि बताइएको छ ।