वीरगंज । चोरीको मोटरसाइकल चलाउने ६ जनालाई जिल्ला प्रहरी कार्यालय पर्साले पक्राउ गरेको छ । विभिन्न स्थानबाट मोटरसाइकल चोरी गरेर चलाइरहेको सूचनाको आधारमा खटिएको प्रहरीलाई ५ वटा मोटरसाइकलसहित ६ जनालाई पक्राउ गरेको हो । प्र.२ ०३००३ प ७५०९ र ना. ३७ प २०२४ नम्बरको मोटरसाइकल चोरीको कसूरमा वीरगञ्ज महानगरपालिका वडा नम्बर १३ राधेमाई निवासी २१ वर्षीय सुमित कुशवाहालाई प्रहरीले पक्राउ गरेको हो । सुमित कुशवाहासँगै वीरगञ्ज महानगरपालिका वडा नम्बर १२ मुर्ली निवासी १९ वर्षीय राजन मण्डललाई पनि पक्राउ गरेको जिल्ला प्रहरी कार्यालय पर्साका प्रवक्ता एवम् प्रहरी नायब उपरीक्षक दिपक गिरीले जानकारी दिए । यि दुवै जना वीरगञ्ज महानगरपालिका वडा नम्बर २५ ड्राइपोर्टबाट पक्राउ परेका हुन् ।

वीरगञ्ज १२ मुर्लीकै १९ वर्षीय अबय मण्डललाई पनि प्रहरीले पक्राउ गरेको हो । वीरगञ्ज महानगरपालिका वडा नम्बर ११ रानीघाटका २० वर्षीय नन्दन कुमार चौरसियालाई प्रहरीले पक्राउ गरेको छ । ना. १८ प ४२१९ नम्बरको मोटरसाइकल चोरी कसूरमा चौरसियालाइ पक्राउ गरिएको प्रहरी नायब उपरीक्षक गिरीले बताए । उनका अनुसार चौरसियालाई वीरगञ्ज महानगरपालिका वडा नम्बर २५ रामगढवाबाट पक्राउ गरिएको हो । सोही मोटरसाइकल चोरीमा संलग्न वीरगञ्ज महानगरपालिका वडा नम्बर १० घडिअर्वाका २० वर्षीय रिकी मण्डल पनि पक्राउ परेका छन् ।

त्यस्तै पर्साको सखुवाप्रसौनी गाउँपालिका वडा नम्बर २ गुलवरियाबाट पनि प्रहरीले १ जनालाई पक्राउ गरेको छ । पोखरिया नगरपालिका वडा नम्बर ६ सिर्सिया निवासी २५ वर्षीय खरबुद आलमलाई पक्राउ गरिएको प्रवक्ता एवम् सूचना अधिकारी गिरीले बताए । पक्राउ परेका छ जनालाई नै चोरी सम्बन्धी कसूरमा आवश्यक अनुसन्धान अघि बढाइएको छ ।