वीरगंज । टी-२० विश्वकपको पहिलो चरणमा वेस्टइण्डिज स्कटल्याण्डसँग स्तब्ध बनेको छ । सोमबार सम्पन्न खेलमा स्कटल्याण्डले वेस्टइण्डिजलाई ४२ रनले पराजित गरेको छ । स्कटल्याण्डले दिएको १६१ रनको लक्ष्य पछाएको वेस्टइण्डिजले १८.३ ओभरमा अलआउट हुदै ११८ रन मात्र बनाएको थियो । यस अघि टस हारेर पहिला ब्याटिंग गरेको स्कटल्याण्डले २० ओभरमा ५ विकेट गुमाउदै १६० रन बनाएको थियो ।
यो जितसहित स्कटल्याण्डले टी-२० विश्वकपमा विजयी शुरुवात गरेको छ र समुह बि मा महत्वपूर्ण २ अंक हासिल गरेको छ । त्यस्तै आइतबार समुह ए मा श्रीलंका नामिबियासँग स्तब्ध भएको थियो भने सोमबार समुह बि मा वेस्टइण्डिज स्तब्ध भएको छ । अष्ट्रेलियामा आइतबारबाट टी–२० विश्वकप सुरु भएको छ । २९ दिने यस प्रतियोगितामा ४५ वटा खेल हुने छन् । यो पहिलो राउन्डबाट सुरु भएको छ । जसमा आठ टोलीले कुल १२ खेल खेल्नेछन् । यो राउण्डमा दुई पटक टी–२० विश्वकप जितेको वेस्ट इन्डिज र एसियाली च्याम्पियन श्रीलंका पनि रहेको छ । श्रीलंकाले सन् २०१४ मा उपाधि जितेको थियो । दुवै टोली सुपर–१२ मा छनोट हुन सकेनन् ।
त्यसैले पहिलो राउण्ड खेलिरहेका छन् । यस राउण्डमा श्रीलंका र वेस्टइन्डिजका अलावा आयरल्याण्ड, स्कटल्याण्ड, जिम्बाब्वे, नेदरल्यान्ड्स, नामिबिया र युएईका टिमले भाग लिएका छन् । यी मध्ये समुह ए मा नामिबिया, नेदरल्याण्डस, श्रीलंका र युएई रहेका छन् भने समुह बि मा आयरल्याण्ड, स्कटल्याण्ड, जिम्बाबे र वेस्टइण्डिज रहेका छन् । दुवै समुहमा रहेका देशले एक अर्काविरुद्ध एक एक खेल खेल्ने छन् र शिर्ष दुई स्थानमा रहने चार टोली सुपर–१२ मा पुग्नेछन् ।
