वीरगंज । चलचित्र विकास बोर्डले हिन्दी चलचित्र सेन्सरका लागि कम्तीमा एक हप्ता अगाडि नै दरखास्त दिनुपर्ने बताएको छ । शुक्रबार रिलिज हुने सिनेमा बिहीबार बेलुकासम्म पनि सेन्सरका लागि आउने गरेको गुनासो चलचित्रकर्मीहरूबाटै आइरहेका बेला बोर्डले सात दिन अगाडि नै सेन्सरका लागि दरखास्त दिन भनेको हो ।
यो नियम कात्तिक १ गतेदेखि लागु हुनेछ । नेपाली सिनेमाको हकमा पनि एक साता आगाडि नै आवश्यक कागजातसहित सेन्सरका लागि दरखास्त दिनु पर्नेछ । नेपाली चलचित्रलाई सेन्सरमा कडाइ गर्ने गरे पनि हिन्दी भने रिलिजको अघिल्लो दिन आएर सेन्सर गर्ने गरिएकोभन्दै चलचित्रकर्मीहरूले आफ्नै देशमा आफ्नै चलचित्रले विभेद सहनु परिरहेको गुनासो गर्दै आएका थिए ।
बोर्डले जाँच पास प्रक्रियालाई व्यवस्थित र सहज बनाउन यो नियम लागु गरिएको पनि स्पष्ट पारेको छ । “हामीले कसैलाई अफ्ठ्यारोमा पार्न वा बाँध्न यो निर्णय गरेका हैनौं । हामी चलचित्रकर्मीलाई नै सहज र व्यवस्थित होस् भनेर यो गरेका हौँ,” चलचित्र विकास बोर्डका सदस्य अर्जुन कुमार भन्छन्, “सिनेमा घर नवीकरण गर्नूस्, कर तिर्नूस भन्नु बोर्डको नियमित कार्य हो ।” गत हप्ता हिन्दी सिनेमा ‘ब्रम्हश्त्र’ अन्तिम समयसम्म नेपालमा सेन्सर नहुँदा शुक्रबार रिलिज हुने नेपाली सिनेमाले बिहीबार अबेर साँझसम्म शो पाएका थिएनन् ।
