वीरगंज । मधेश विश्वविद्यालयले आगामी शैक्षिक सत्रदेखि कक्षा सञ्चालन गर्नेभएको छ । मधेश विश्वविद्यालयका उपकुलपति डा. दिपक शाक्यले मधेश विश्वविद्यालयले आगामी शैक्षिक सत्रदेखि नै कक्षा सञ्चालन गर्ने बताउनुभयो । बीरगन्जमा रहेको नेशनल ट्रेडिङ्गको १५ कठ्ठा जग्गा र त्यसमा रहेको प्रशासनिक भवन भाडामा लिएर अहिले प्रशासनिक कार्यालय निर्माण गरिएको बताउँदै मधेश विश्वविद्यालयका उपकुलपति शाक्यले आफूले औपचारिक रुपमा बुधबार सपथग्रहण गर्ने र विहीबार विहान उक्त नवनिर्मित मधेश विश्वविद्यालयको प्रशासनिक कार्यालयको उदघाटन गर्ने कार्यक्रम रहेको जानकारी दिनुभयो ।

मधेश विश्वविद्यालयले पोलीटेक्निकल र आई.टी.सम्बन्धी त्यस्तैगरी एग्रीकल्चर बिजनेश म्यानेजमेन्ट विषयमध्ये कुनै कक्षा आगामी शैक्षिक सत्रदेखि नै सञ्चालनमा ल्याउने तयारीमा रहेको बताउनुभयो । उदघाटन पश्चात विषयगत विज्ञ कमिटी गठन गरेर त्यसले वोर्ड गठन गरी पाठ्यक्रम निर्माण गर्ने र निर्माण भएको पाठ्यक्रम पठनपाठन हुने उहाँले बताउनुभयो । कम्तिमा ५० बिघा क्षेत्रफलको जग्गा खोजीमा रहेको, त्यस्तै जग्गा पाएमा गाउँतिर भए पनि विश्वविद्यालय सार्ने योजना रहेको उहाँको भनाइ छ । १० देखि १५ बिघा जग्गा दान गर्न प्रशस्त दाताहरु आएको दाबी गर्दै उहाँले ४० देखि ५० विघा क्षेत्रफलमा कार्यालय भएमा व्यवस्थित पार्न सकिने डा. शाक्यले बताए ।

एक सय करोडको लगानी गरेर भए पनि मधेश विश्वविद्यालयको भौतिक संरचना निर्माण गरिने डा. शाक्यले बताउनुभयो । बुधबार आज हुने पदस्थापना कार्यक्रममा मधेश प्रदेशका मुख्यमन्त्री, संघीय सरकारका वन तथा जनसंख्या मन्त्री, प्रदेश सरकारका सामान्य प्रशासन मन्त्री, जनता समाजवादी पार्टीका केन्द्रीय अध्यक्ष लगायतको उपस्थिति रहने विश्वविद्यालयका उपकुलपति डा. शाक्यले बताए ।काठमाडौं विश्वविद्यालय, पूर्वाञ्चल विश्वविद्यालय, पोखरा विश्वविद्यालय, गण्डकी विश्वविद्यालय, कृषि विश्वविद्यालयका भाइसचान्सलर लगायतका विज्ञहरु कार्यक्रममा सहभागी हुने र अनुभव साटासाट गर्ने कार्यक्रम समेत रहेको उहाँले बताउनुभयो ।