वीरगंज । राष्ट्रिय प्रजातन्त्र पार्टी (राप्रपा) की केन्द्रीय सदस्य रेखा थापाले केपी ओलीसँगको भेटको क्रममा समसामयिक राजनीति र आगामी चुनावमा महिलालाई उम्मेदवार बनाउने सवालमा कुराकानी भएको बताएकी छन् । गत बुधबार थापा र राप्रपाकी महामन्त्री कुन्ती शाहीले बालुवाटार पुगेर एमाले अध्यक्ष ओलीसँग भेट गरेका थिए ।
यस क्रममा नेत्री थापाले आफू परिपक्व भइसकेको र राजनीतिमा सक्रिय रहेको बताएकी छन् । एमाले अध्यक्ष ओलीसँगको भेटबारे उठेका जिज्ञासाको जवाफ दिँदै उनले यस्तो प्रतिक्रिया दिएकी हुन् । हरेक दलहरूले महिलालाई कोटामै सीमित गरिरहेको सन्दर्भ निकाल्दै उनले एमालेका अध्यक्ष ओलीसँग पनि महिलालाई प्रत्यक्षतर्फ उठाउने कि भन्ने बारे छलफल गरेको बताइन् । थापाले भनेकी छन्, ‘यो पटकको चुनावमा महिलालाई प्रतक्षतर्फ उठाउने कि भन्ने सवालमा उहाँसँग छलफल भएको हो । महिलाहरूलाई त्यसरी उठाउँदा उनीहरू सक्षम हुन्छन् ।
‘एमाले अध्यक्ष ओलीसँगको भेटबारे राप्रपाकी महामन्त्री कुन्ती शाहीले पनि राजनीति र समकालीन परिस्थितिबारे छलफल भएको बताइन् । तर कुनै खास एजेन्डामा भेट्न नगएको उनको भनाइ छ । अभिनेत्रीसमेत रहेकी थापा यसअघि माओवादी केन्द्रमा आवद्ध थिइन् । माओवादी केन्द्र परित्याग गर्दै उनी राप्रपाको एकता महाधिवेशनअघि राप्रपामा प्रवेश गरेकी हुन् । साथै उनी महामन्त्री पदमा कुन्ती शाहीसँग पराजित भएकी थिइन् ।
