वीरगंज । किसानहरुको समस्यामा गम्भिर हुन जनता समाजवादी पार्टी (जसपा) पर्साले प्रधानमन्त्रीको ध्यानाकर्षण गराएको छ । जसपा पर्साका अध्यक्ष रामनरेश प्रसाद यादव नेतृत्वको टोलीले बिहिवार जिल्ला प्रशासन कार्यालय पर्साका प्रमुख जिल्ला अधिकारी (प्रजिअ) उमेश कुमार ढकालमार्फत प्रधानमन्त्री शेरबहादुर देउवालाई ज्ञापन पत्र बुझाउँदै किसानका समस्या समाधान गर्न माग गरेको छ ।

७ बुँदे मागसहित बुझाइएको ज्ञापन पत्रमार्फत सर्वप्रथम मधेश प्रदेशलाई सुक्खा क्षेत्र घोषणा गरी किसानहरुलाई विशेष राहत प्याकेजको व्यवस्था गर्न माग गरिएको छ । किसानहरुको लागि पर्याप्त मात्रामा मलखादको व्यवस्था गर्नुका साथै, किसानहरुले बैंकबाट लिएको ऋणको ब्याज मिनाहा गर्न, सिचाईका लागि डिप बोरींगसहित अन्य बैकल्पिक व्यवस्था थर्न र सहुलियत स्वरुप डिजेलको व्यवस्था गर्न ज्ञापन पत्रमा माग गरिएको छ ।

किसानहरुको सुविधाको लागि कृषि विद्युतिकरणको व्यवस्था गर्न र कृषि मिटर उपलब्ध गराई विद्युत महशुल निःशूल्क गर्नुपर्ने माग गरिएको छ । ज्ञापन पत्र बुझ्दै प्रमुख जिल्ला अधिकारी ढकालले जसपाले उठाएका किसानका माग जायज भएको बताउँदै आफुले मागको सम्बोधनका लागि पहल गर्ने आश्वासन दिएका छन् । ज्ञापन पत्र बुझाउन जसपा मधेश प्रदेश समितिका सदस्य गौरीशंकर साह, महाराज यादव, जिल्ला सदस्य प्रदिप जयसवाल, युवा नेताहरु मुकेश द्विवेदी, गोपि यादव, विद्यार्थी नेता शशी पाण्डे लगायतको उपस्थिती रहेको जसपा पर्साका सचिव तबरेज अहमदले जानकारी दिए ।