मुलुकको प्रमुख आर्थिक नाका वीरगञ्ज भन्सार नाका भएर गत आर्थिक वर्ष २०७८/७९ मा विदेशबाट हुने सामानहरूको आयातमा वृद्धि भएको छ। गत आर्थिक वर्षमा यस नाका भएर ७ खर्बभन्दा बढीको सामानहरू विदेशबाट आयात भएको छ भने नेपालबाट विदेशमा ८० अर्बको सामानहरू निर्यात भएको छ। वीरगञ्ज भन्सार कार्यालयले जारी गरेको तथ्यांक अनुसार गत आर्थिक वर्षमा यो नाका भएर विदेशबाट कुल ७ खर्ब ६ अर्ब २९ करोड २४ लाख ३० हजारको सामान आयात भएको छ। यो अघिल्लो आर्थिक वर्ष २०७७/७८ भन्दा ३८ प्रतिशत बढी आयात हो।

२०७७/७८ मा भने वीरगञ्ज नाका भएर ५ खर्ब ११ अर्ब ७८ करोड १६ लाख २९ हजारको सामान आयात गरिएको थियो। यधपि आयात बढेसँगै यस नाका भएर विदेशमा हुने निर्यात पनि बढेको छ। गत आर्थिक वर्ष २०७८/७९ मा यो नाका भएर नेपालबाट कुल ८० अर्ब ४९ करोड ३३ लाख ७७ हजार बराबरको बिभिन्न सामानहरू विदेशमा निर्यात भएको छ। यो अघिल्लो आर्थिक वर्षको भन्दा ५० प्रतिशतले बढी निर्यात हो। २०७७/७८ मा भने वीरगञ्ज नाका भएर नेपालबाट विदेशमा ५३ अर्ब ६८ करोड २८ लाख ७३ हजार बराबरको सामान निर्यात गरिएको वीरगञ्ज भन्सार कार्यालयको तथ्यांकले देखाएको छ। वीरगञ्ज भन्सारको तथ्यांक अनुसार बितेको आर्थिक वर्षमा अघिल्लो अर्थिक वर्षभन्दा नेपाललाई विदेशी ब्यापारबाट हुँदै आएको घाटासमेत बढेको छ। गत आर्थिक वर्ष २०७८/७९ मा वीरगञ्ज नाका भएर नेपाललाई कुल ६ खर्ब २५ अर्ब ७९ करोड ९० लाख ५३ हजार बराबरको ब्यापार घाटा भएको छ।

यो गतभन्दा अघिल्लो आर्थिक वर्ष २०७७/७८ मा भएको ब्यापार घाटाभन्दा ३७ प्रतिशतले बढी हो। अघिल्लो आर्थिक वर्षमा यो नाका भएर नेपाललाई कुल चार खर्ब ५८ अर्ब ९ करोड ८७ लाख ५६ हजारको ब्यापार घाटा भएको थियो। हरेक वर्ष यस नाका भएर नेपालमा मुख्य रूपमा आयात हुने सामानहरू यसै नाकाबाट ल्याइने गरिएकाले पनि वीरगञ्ज भन्सार नाकाबाट ब्यापार घाटा वृद्धि हुँदै गएको हो। वीरगञ्ज भन्सार नाका भएर विदेशबाट नेपालमा मुख्य रूपमा डिजेल, पेट्रोल, एलपी ग्यास, मोटर गाडी तथा त्यसका पाटपुर्जाहरू, एमएस बिलेट, औधोगिक कच्चा पदार्थहरू आयात हुने गरेका छन्। यो नाका भएर नेपालबाट विदेशमा मुख्यतः सूर्यमुखी, पाम, भटमासको प्रशोधित तेल, जुस, जमोठ कपडा, सिन्थेटिक यार्न, उनी गलैँचा,दन्त मन्जन, पिना, स्पोर्टस सुज लगायतका वस्तुहरू निर्यात हुने गरेको वीरगञ्ज भन्सार कार्यालयले जनाएको छ।