वीरगंज । सार्वजनिक नाला अतिक्रमण गरेर वीरगञ्जको आदर्शनगरमा बनाइएको निजी पर्खाल वीरगञ्ज महानगरपालिकाले भत्काएको छ ।

आदर्शनगरस्थित होटल दियालो लर्डस र कैलाश होटलको बिचमा रहेको नाला वीरगञ्ज महानगरपालिकाका सरसफाई कर्मचारी र नगर प्रहरीले भत्काएका हुन् । उद्योगी सुरेश गाडियाले बनाएको बाउण्ड्री वाल भत्काएर खाली गर्न महानगरपालिकाले पटकपटक मौखिक एवम् लिखित रुपमा पत्र दिँदा पनि नहटाएपछि बाध्य भएर हटाइएको वीरगञ्ज महानगरपालिकाका प्रमुख राजेशमान सिंहले बताए ।

मेयर सिंहकै निर्देशनमा नाला अतिक्रमण गरेर बनाइएको पर्खाल भत्काइएको सरसफाई व्यवस्थापन शाखाका प्रमुख सर्फुदिन मियाले बताए । उनका अनुसार सो क्षेत्रमा सुरेश गाडियासँगै रमेश अग्रवाल र राजेश्वर प्रसाद साहले पनि नाला अतिक्रमण गरेका छन् । तिन जनाकै नाममा लिखित पत्र पठाउँदा पनि पत्रको पालना नगरेर उल्टै अटेरी गरेपछि नालाको ठाउँमा निर्माण गरिएका संरचना भत्काइएको मियाँको भनाई छ ।

उनले भने, “त्यो ठाउँमा भएको संरचना हटाउन १ वर्ष अघि नै पत्र पठाउँदा पनि काम हुन सकेको थिएन । अहिलेको मेयर साबले नाला सफाईमा जोड दिनुभएको छ । त्यही भएर हामीले उहाँकै निर्देशनमा भत्काएका हौँ ।” वीरगञ्जका मुख्यसँगै अन्य गल्लीहरुका नाला पनि सफा गर्नै क्रममा अतिक्रमण भएको पाइएमा हटाउने र अतिक्रमण गर्नेलाई कारवाही गर्ने मेयर सिंहले चेतावनी पनि दिएका छन् । यात्रा डिलीबाट संभाल गरिएको