वीरगंज । वीरगन्जमा पर्यटन क्षेत्रको विकासका लागि प्राकृतिक चिडीयाखाना बन्ने निश्चित भएको छ ।

केहि दिन पहिले गहृनगर वीरगन्ज आएका बेला वन तथा वातावरण मन्त्री प्रदीप यादवले घोषणा गरे अनुरुप वीरगन्जमा प्राकृतिक चिडियाखाना स्थापना गर्ने निर्णय वन मन्त्रालयले गरेको छ ।वीरगन्जमा चिडियाखानाको सम्भाव्यता अध्ययन गर्न मङगलबार वनमन्त्री यादवले ८ सदस्यिय कार्यदल गठन गरेका छन् ।

उक्त कार्यदलले वीरगन्ज महानगरपालिकाको वडा नम्बर ३१ सोलखपुर र वडा नम्बर ३२ रामवनमा चिडियाखाना स्थापनाका लागि सम्भाव्यता अध्ययन गरेर १० दिन भित्र मन्त्रालयमा प्रतिवेदन प्रस्तुत गर्ने कार्यदेश पाएको छ ।कार्यदलले प्रतिवेदन पेश गरे लगत्तै यसै महिना भित्र चिडियाखाना स्थापनाका लागि काम शुरु गर्न मन्त्री यादवले मन्त्रालयका कर्मचारीलाइ निर्देशन पनि दिएका छन् ।

राष्ट्रिय निकुञ्ज तथा वन्यजन्तु संरक्षण विभागका उपमहानिर्देशक अजय कार्कीको संयोजकत्वमा कार्यदल गठन गरिएको मन्त्री यादवका उप–स्वकीय सचिव निखिल बर्णवालले जानकारी दिए ।कार्कीको संयोजकत्वमा गठीत कार्यदलको सदस्यमा मधेस प्रदेशका वन निर्देशक, वीरगन्ज महानगरपालिकाका प्रमुख प्रशासकिय अधिकृत, डिभिजन वन कार्यालय पर्साका वन अधिकृत, पर्सा राष्ट्रिय निकुञ्जका प्रमुख संरक्षण अधिकृत, वन तथा भू संरक्षण विभागका सहायक वन अधिकृत सवनम पाठक र राष्ट्रिय प्रकृति संरक्षण कोषका विज्ञ रहेका छन् । कार्यदलको सदस्य सचिवमा राष्ट्रिय निकुञ्ज तथा वन्यजन्तु संरक्षण विभागका सहायक संरक्षण अधिकृत पेम्बा शेर्पा रहेका छन् ।

चिडियाखानाको स्थापनाले वीरगन्ज क्षेत्रमा पर्यटकीय गतिविधि बढ्नुका साथै वनजङगल संरक्षणमा पनि टेवा पुग्ने मन्त्री यादवको विश्वास छ ।यादवले भने ,‘वीरगन्जकै नाका हुदै वर्षेनी लाखौँ पर्यटक नेपाल भित्रिने गर्छन्, तर वीरगन्जमा नबसेर उनिहरु अन्य ठाउँहरु घुम्न जान्छन्, किन भने पर्यटकलाई वीरगन्जमा आकर्षित गर्न सक्ने कुनै त्यस्तो लोभलाग्दो गन्तव्य छैन ,त्यसैले पनि वीरगन्जमा पर्यटक रोक्न र यहाँको आर्थिक गतिविधिलाई बढाउन चिडियाखाना स्थापना गर्न लागेका हौं ,यसले पर्यटकीय र आर्थिक गतिविधि पनि बढ्ने विश्वास लिएको छु ।’ मङगलबारको बैठकमा सहभागी मधेस प्रदेशका मुख्यमन्त्री लालबाबु राउतले पनि वीरगन्जमा चिडियाखाना स्थापना गर्नका लागि प्रदेश सरकार पनि हरेक सहयोग गर्न तयार रहेको बताए ।उनले प्रदेश सरकारले चिडियाखाना स्थापनाका लागि जग्गा उपलब्ध गराउनेदेखि बजेट व्यवस्थापनमा समेत सहयोग गर्ने प्रतिबद्धता जनाए ।

बैठकमा सहभागी वीरगन्ज महानगरपालिकाका मेयर राजेशमान सिंहले पनि चिडियाखाना स्थापनाले पर्यटकीय गतिविधि बढ्नुका साथै वन जङ्गलमा भइरहेको अतिक्रमण रोक्न सघाउ पुग्ने बताए । चिडियाखाना स्थापनाका लागि जग्गा उपलब्ध गराउन र मन्त्रालयसँग समन्वय गर्न महानगरको कार्यपालिका बैठकले निर्णयसमेत गरिसकेको मेयर सिंहले जानकारी दिए ।