वीरगंज । मधेस प्रदेश सरकारले आर्थिक वर्ष २०७९/८० का लागि ल्याएको बजेट सर्वसम्मतले पारित भएको छ। आइतबार बसेको प्रदेशसभा बैठकबाट बजेट सर्वसम्मतले पारित भएको हो। प्रदेशसभाको बैठकमा अर्थमन्त्री शैलेन्द्रप्रसाद साहले पेस गरेको आर्थिक विधेयक २०७९ तथा कर तथा गैरकर राजश्व लगाउने तथा उठाउने सम्बन्धमा व्यवस्था गर्न बनेको विधेयक सर्वसम्मतले पारित भएपछि बजेट पारित भएको हो।

शनिबार प्रदेशसभाबाट विनियोजन विधेयक पारित भएको थियो। बजेटको छलफलमा प्रदेशसभा सदस्यहरूले उठाएका प्रश्नहरूको अर्थमन्त्री साहले सदनमा जवाफ दिएपछि बजेट पास गरिएको हो।

असार १ मा मधेस प्रदेशका अर्थमन्त्री साहले आव २०७९/०८०का लागि ४६ अर्ब ८८ करोड ९ लाख ४६ हजारको बजेट प्रस्तुत गरेका थिए। बजेट पारित भएसँगै प्रदेशको प्रदेशसभा बैठक अनिश्चितकालका लागि स्थगित गरिएको छ।