वीरगञ्ज । वीरगञ्ज भंसार कार्यालय आफैँ तस्करीमा लिप्त भएको पाइएको छ । नाकाबाट हुने आयातको भंसार जाँच पास गर्ने कार्यालय नै तस्करीमा संलग्न हुनु राज्य निरीह भएको प्रमाण पनि हो । आयातित सामानको सही तरिकाले भंसार जाँच गरेर सो बराबरको कर संकलन गरी राज्य कोषमा दाखिला गर्नुपर्ने दायित्व भन्सार कार्यालयका अधिकृतहरु तथा कर्मचारीहरुको जिम्मेवारी हो । तर, भंसारका हाकिम र अधिकृत नै चोरी, तस्करीप्रति आँखा चिम्लेर बस्दा सुरक्षा निकाय समेत छक्क परेको बताइएको छ ।
भंसार योग्य सामानको जाँच गर्ने काम भंसार कार्यालयमा खटिएका कर्मचारीको हो । भंसार चुवाहट भएको खण्डमा निगरानी गर्ने जिम्मेवारी सशस्त्र प्रहरी बलले पाएको छ । तर, यी दुवै निकायहरुले जिम्मेवारी इमानदारीपूर्वक निर्वाह गरेको महसुस हुँदैन । वीरगञ्ज भंसार कार्यालय र सशस्त्र प्रहरी संगठनले अवैध ओसारपसारका लागि लाइन दिएकाले दैनिक करोडौंका सामान तस्करी भइरहेको तथ्य जिल्ला प्रहरी कार्यालय पर्साले प्रत्येक दिन जसो लाखो कडोरोका अवैध मालसामान बरामद गरेबाट स्पष्ट हुन्छ । प्रमुख भंसार प्रशासक अरुण पोखरेल राजश्व संकलनमा भन्दा पनि कमाउ धन्दामा बढी लिप्त भएका कारणले पोखरेलको कार्यकालमा तस्करी बढी चम्किने गरेको खवर छ । यही कारण देशकै प्रमुख भंसार कार्यालयको हालत दिनप्रतिदिन दयनीय हुँदै गएको भंसार बिभाग स्रोत बताउछ ।
पोखरेल सुब्बा तहको जागिरदेखि नै आकर्षक मानिएका स्थानमा सरुवा भएर जाने भाग्यमानी कर्मचारीमा पर्दछन् । पहुँचको आधारमा स्थानीय विकास अधिकारीको भूमिकादेखि प्रमुख जिल्ला अधिकारीसम्मको स्वाद चाखिसकेका पोखरेल हाल चाहिं अर्थका बोलवाला सहसचिव कर्मचारी भएको मन्त्रालयका कर्मचारीले बताउने गरेका छन ।
त्यसैगरी प्रमुख भंसार अधिकृतद्वय हरिहर पौडेल र दिलीप के.सीलाई पनि तस्करी नियन्त्रणमा भन्दा बढी चासो र चिन्ता कसरी धनार्जन गर्ने भन्ने रहेको चर्चा सुरक्षा निकायमा हुने गरेको छ । त्यही भएर बिलविजक भन्दा बढी सामान भन्सार पास हुने गरेको, अवैध ओसारपसार र तस्करी बढिरहेको पाइएको छ । भ.स.नि.नागेन्द्र प्रसाद यादवको नेतृत्वमा रहेको वीरगञ्ज भन्सार कार्यालय अन्तरगतको राजस्व चुहावट नियन्त्रण, गस्ती व्यवस्थापन तथा यात्रु जाँचपास शाखाले के काम गर्छ ? अनि कस्को सेवा गरेर भन्सार शुल्क मार्न छुट दिइरहेको छ ? यो पनि कसैलाई थाहा छैन । उता पोखरेल, पौडेल र केसीको कमजोर प्रशासनका कारण नै ट्रकका ट्रक मालसामान विलविजक भन्दा बढी, भंसार चेक जाँचपास बाट प्रवेश हुने गरेको बुझिएको छ ।
वीरगञ्ज भन्सारका हाकिम र कर्मचारीहरुले तस्करीका लागि लाइन खुला गरेको पुष्टि नेपाल प्रहरीले विलविजक नभएका अवैध सामान दैनिक लाखो करोडो भन्दा बढीको बरामद गरेबाट हुन्छ । तर, वीरगञ्ज भन्सारका कर्मचारीहरुले चाहिं कहिल्यै एक रुपैयाँको पनि अवैध सामान फेला नपार्नु वा सार्वजनिक नहुनु भन्सारका कर्मचारीहरुको नियत यसैबाट स्पष्ट हुन्छ । देशकै प्रमुख भन्सार नाकाबाट ठूलो परिणाममा सामानको तस्करी हुने गरेको तथ्य प्रस्तुत गर्नका लागि केहि घटना काफी छन् । ती घटनाले भन्सार कार्यालय जिम्मेवार छैन भन्ने कुरा प्रष्ट भएको छ । भन्सारका प्रमुख प्रशासक पोखरेलको गैरजिम्मेवारीपन कारण चोरीपैठारीको समस्या बिकराल बन्दै गएको पाइएको छ ।
