वीरगञ्ज । वीरगञ्ज भन्सार नाकाबाट नेपाललाई साढे पाँच खर्बभन्दा बढीको व्यापार घाटा भएको छ। ०७८/७९ को पछिल्लो ११ महिनाको अवधिमा नेपाललाई यस भन्सार नाका भएर कुल ५ खर्ब ६५ अर्ब २३ करोड ७० लाख २२ हजार बराबरको व्यापार घाटा भएको कार्यालयले जारी गरेको तथ्यांकमा उल्लेख छ। गत आर्थिक वर्षको यही अवधिमा भने नेपाललाई वीरगञ्ज भन्सार भएर चार खर्ब १२ अर्ब ४० करोड ५६ लाख ८४ हजार बराबरको व्यापार घाटा भएको छ। यस आँकडाअनुसार गत वर्ष ११ महिनाको अवधिमा चालु वर्षको ११ महिनामा नेपाललाई एक खर्ब ५२ अर्ब ८३ करोड १३ लाख ३८ हजारभन्दा बढी व्यापार घाटा भएको हो।

यो गत आर्थिक वर्षभन्दा ३७ प्रतिशतले बढी व्यापार घाटा रहेको छ। चालु वर्षको ११ महिनामा नेपालले वीरगञ्ज भन्सार नाका भएर कुल ७ खर्ब १८ अर्ब ३४ करोड ६५ लाख २६ हजार बराबरको वैदेशिक व्यापार गरेको छ। जसमध्ये नेपालले विदेशबाट वीरगञ्ज भन्सार नाका भएर कुल ६ खर्ब ४१ अर्ब ७९ करोड १७ लाख ७४ हजार बराबरको सामान आयात गरेको छ भने नेपालले यस नाका भएर विदेशमा कुल ७६ अर्ब ५५ करोड ४७ लाख ५२ हजार बराबरको सामान मात्रै विदेश निर्यात गरेको छ। अर्थात् नेपालले विदेशबाट ८९.३४ प्रतिशत आयात गरेको छ भने निर्यात जम्मा १०.६६ प्रतिशत मात्रै वीरगञ्ज भन्सार नाका भएर गरेको तथ्यांकले देखाएको छ।

गत आर्थिक वर्षको यही अवधिमा भने नेपालले वीरगञ्ज भन्सार नाका भएर कुल पाँच खर्ब ८९ करोड ३ लाख ५० हजार बराबरको वैदेशिक व्यापार गरेको थियो। जसमा नेपालले कुल चार खर्ब ५६ अर्ब ६४ करोड ८० लाख १७ हजार बरारबको सामान आयात गरेको थियो। नेपालले विदेशमा भने जम्मा ४४ अर्ब २४ करोड २३ लाख ३३ हजार बराबरको सामान निर्यात गरेको थियो। यस अविधमा वैदेशिक व्यापार भएको मध्ये नेपालले वीरगञ्ज भन्सार नाका भएर ९१.१७ प्रतिशत सामान आयात गरेको थियो भने जम्मा ८.८३ प्रतिशत सामान मात्रै निर्यात गरेको थियो। वीरगञ्ज भन्सार नाका भएर नेपालले मुख्य रुपमा डिजेल, पेट्रोल, मट्टीतेल, खाना पकाउने ग्यास, औद्योगिक कच्चा पदार्थलगायत सामान आयात गर्ने गरेको छ। नेपालले यस नाका भएर फलफूलको जुस, प्रशोधित पाम तेल, भटमासको तेल, जमोठ कपडा, सेन्थेटिक यार्न, पिनालगायत सामान निर्यात गर्दै आएको छ।