एजेन्सी – बलिउडको लोकप्रिय चलचित्र ‘डन’को तेस्रो भाग निर्माण हुने भएको छ। चलचित्रमा अमिताभ बच्चन र शाहरुख खान सँगै देखिनेछन्। फरहान अख्तरको कम्पनी एक्सेल इन्टरटेनमेन्ट सिक्वेलका लागि योजना बनाइरहेको छ। जसका लागि फरहान स्क्रिप्टको काममा जुटिसकेका छन्। ‘केही समययता एक्सेल कथावस्तुको अभाव भएपछि ‘डन ३’ बनाउने या नबनाउने भन्ने विषयमा अन्योलमा थियो। तर, अहिले उसले एउटा गज्जबको कथा फेला पारेको छ। त्यसकारण चलचित्रका लागि तयारी पनि त्यसै अनुसार सुरु भइसकेको छ’, चलचित्र निकट स्रोतले भनेको छ।

अहिले फरहानले स्क्रिप्ट लेखिरहेकाले स्क्रिप्ट लक हुनासाथ उनले यो कथा शाहरुखलाई सुनाउनेछन्। यसपटक चलचित्रमा निर्माताले रणवीर सिंहलाई पनि समेट्ने योजना बनाएका छन्।
चन्द्रा बरोटद्वारा निर्देशित एक्सन-थ्रीलर चलचित्र ‘डन’ सन् १९७८ मा रिलिज भएको थियो। यो चलचित्रमा अमिताभका अलावा जीनत अमान, प्राण र इफ्तेखारले प्रमुख भूमिका निभाएका थिए| यो चलचित्रको कथा मस्ट वान्टेड डनको वरपर घुमेको थियो। जसमा अमिताभले डनको भूमिका निभाएका थिए। उनको दोहोरो भूमिका थियो।