वीरगंज | प्रदेश २ कै मुख्य छठघाटको रूपमा चिनिने वीरगंजको घडीअर्वा पोखरी छठघाटको तयारी पूरा भएको छ ।
घडीअर्वा छठ पूजा तथा व्यवस्थापन समितिले शुक्रवार पत्रकार सम्मेलन गर्दै छठघाट तयारीको सम्पूर्ण काम सकिएको जनाएको छ ।

दिउँसो ३ बजे घडीअर्वा पोखरी परिसरमा आयोजित पत्रकार सम्मेलनमा पदाधिकारीहरूले यस वर्ष करीब १९ लाख रुपैयाँको बजेट रहेकोमा रु १५ लाख ७० हजार खर्च हुने र रु ३ लाख ३० हजार बचत हुने जनाएका छन् । गत वर्ष छठघाट तयारीमा रु १६ लाख ८७ हजार बजेट विनियोजन गरिएकोमा रु १४ लाख ७३ हजार खर्च गर्दै समितिले रु २ लाख १४ हजार बचत गरेको थियो ।त्यसैगरी, पत्रकार सम्मेलनमा गत वर्ष साढे ४ हजारदेखि ५ हजारसम्म व्रतालुहरूको दउरा अटेकोमा यस वर्ष सो सङ्ख्या केही बढ्ने अनुमान गरिएको छ ।

समितिले छठको सँझिया घाटे र बिहनिया घाटे गरी कुल २ सय सुरक्षाकर्मी तथा स्वयंसेवक खटाउने निर्णय गरेको छ ।पर्साका स्थानीय प्रहरी प्रशासनसँग समन्वय गरी ४० जना स्वयंसेवकका साथ  नेपाल प्रहरी तथा सशस्त्र प्रहरीका महिला–पुरुष सुरक्षाकर्मी गरी करीब २ सय सुरक्षाकर्मी परिचालन गरिने सञ्चार संयोजक क्रान्ति साहले जानकारी दिए । त्यसैगरी, पोखरी परिसरलाई निगरानी गर्न पोखरीका चारवटा गेट तथा अन्य ठाउँमा गरी १२ वटा सिसिटिभी क्यामेराबाट निगरानी गर्ने योजना रहेको साहले बताए ।

छठघाट सजाउन भारत, पश्चिम बङ्गालका तथा स्थानीय कारीगर खटाइएको थियो । छठघाटलाई झकिझकाउरूपमा सजाइएको छ ।समितिका अध्यक्ष प्रेम साह कानुको अध्यक्षतामा सम्पन्न पत्रकार सम्मेलनमा वीरगंज–१० का अध्यक्ष रामनगिना साह कानु, समितिका पूर्वअध्यक्षहरू वाल्मीकि साह, लखन साहलगायतको सहभागिता थियो ।