रौतहट । रौतहटमा रहेका दुई सरकारी कार्यालय भवनसहित जग्गा लिलामी प्रकृयामा छन् । रौतहटको सदरमुकाम गौर नगरपालिका–१ मा स्थित जिल्ला प्रशासन कार्यालयको सहियारमा रहेका जिल्ला समन्वय समिति र पूर्वाधार विकास कार्यालयको भवनसहित जग्गा डाक लिलाममा छ ।

रौतहट जिल्ला अदालत गौरमा चलिरहेको बिगो नं.९५० को लेनदेन बिगो मुद्दामा उक्त दुई कार्यालय लिलाम रहेको अदालतले जनाएको छ । सर्लाही जिल्ला तात्कालीन छोटौल गाविस–९ हाल धनकौल गाउँपालिका–२ बस्ने कृष्ण भगत राय यादवको छोरा रामअधार राय यादव वादी रौतहट जिल्ला गाविस बडहर्वा–८ हाल पर्सा जिल्ला वीरगन्ज महानगरपालिका–११ बस्ने गुन्जेश्वरी प्रसादको छोरा बुहारी सुनिलकुमार सिंहको श्रीमती पुनम कुमारी सिंह प्रतिवादी भएको लेनदेन बिगो मुद्दामा रौतहट जिल्ला अदालतले बिगो असुल उपर गर्ने प्रयोजनका लागि डाक लिलामी प्रक्रिया अगाडि बढाएको हो ।

रौतहट जिल्ला अदालतले पत्राचार गरेको गाविस गौर वडा नं. ७ कि.नं. ५४२ को ४ कठा १८ धुर जग्गा डाक लिलामी गरी वादीको विगो भरी भराई गर्नुपर्नेमा सो जग्गाको सम्बन्धमा कार्यालको धारणा खुलाएर पठाई दिन जिल्ला समन्वय समितिमा जानकारी गराएको छ । गुन्जेश्वरीप्रसाद सिंहको नाउँमा दर्ता रहेको सो कित्ता जग्गाको विषयमा रौतहट जिल्ला अदालतले पूर्वाधार विकास कार्यालय रौतहटलाई १६ मंसिर २०७८ मा पत्राचार गर्दा तत्कालीन जिल्ला विकास समितिको प्राविधिक कार्य गर्नका लागि जिल्ला पा्रविधिक कार्यालयका लागि जिल्ला विकास समितिले टेन्डर प्रकृयामार्फत भवन निर्माण भएको थियो ।