वीरगंज । नेपाल टेलिकमबाट गायव भएको पोलहरु कर्मचारीकै खेतमा गाडेको अवस्थामा भेटिएको समाचार एसपी खवरमा प्रकाशन भएपछि प्रहरी प्रशासनले चासो देखाएको छ । जिल्ला प्रहरी कार्यालय धनुषाले नेपाल टेलिकमको जनकपुरधाम कार्यालयलाई पत्र लेख्दै खेतमा भेटिएको पोलहरु टेलिकमको हो होइन, चोरी भएको पोल हो भने कस्ले चोरेको हो भन्ने स्पष्टीकरण सोधेको छ ।
कार्यालयका प्राविधिक साहायक अधिकृत कमलेश यादवको धनुषाधाम नगरपालिका वडा नं. ५ नौ सय विघ्घा स्थित खेतमा सिचाईका लागि विद्युतको लाइन जोडन प्रयोग भएको टेलिकमको पोलहरु सहितको समाचार एसपी खवरले तस्वीर र भिडियो सहित प्रकाशन गरेपछि जनकपुरधामका अन्य समाचार माध्यमहरुले पनि प्रकाशन गरेसंगै प्रहरी अग्रसरता देखाएको हो ।
प्रहरीको यो कस्तो पत्र ?
एता प्रहरीले चोरीको घटना पता लगाएर दोषिलाई कारवाही गर्नुको सट्टा उल्टै टेलिकमलाई चोरी भएको हो होइन ? चोरी भएको हो भने कस्ले चोरेको भनि पत्र काटिदिए पछि शंका उत्पन्न भएको छ । प्रहरीले कुनै व्यक्तिको खेतमा सिचाँइका लागि प्रयोग गरिएको अवस्थामा खेतमा भेटिएको पोलहरुका बारेमा विस्तृत अनुसन्धान गरि पोल कुन माध्यमले त्यहाँ पुगेको भन्ने खोजविन गर्नुको साटो टेलिकमलाई नै चोर को हो ? खुलाई दिनोस भन्ने आशयको प्रश्न गर्दै मंगलवार पत्र काटेको छ ।
टेलिकम जनकपुरधामका प्रमुख अमरेश लाल कर्णले चोरी भएका पोल सहितका सरसमान खोजविनका लागि आफुहरु यस अघिनै जिल्ला प्रहरी कार्यालयमा निवेदन दिइसकेको बताइसकेका छन् ।
