वीरगञ्ज । वीरगञ्जमा श्रमजीवी पत्रकार ऐन कार्यन्वयनको अवस्था, चुनौती र भावि रणनीतिक विषयक अन्तरक्रिया कार्यक्रम सम्पन्न भएको छ । न्यूनतम पारिश्रमिक निर्धारण समितिको आयोजनामा भएको अन्तरक्रिया कार्यक्रममा सरकारले निर्धारण गरेको न्युनतम पारिश्रमिक नपाएको पर्साका श्रमजीवी पत्रकारहरुले गुनासो गरेका छन् । न्युनतम तलब सुविधा समेत नपाउँदा पत्रकारीता पेशामा टिक्नै गाह्रो भइरहेको कार्यक्रममा सहभागी पत्रकारहरुले बताएका थिए ।

विगतमा पनि न्युनतम पारिश्रमिक निर्धारण समितिले अन्तरक्रिया र छलफल गरेपनि कुनै उपलब्धी नभएको सहभागी पत्रकारको प्रतिक्रिया थियो । पत्रकारहरुको गुनासो र सुझाव सुनेपछि न्यूनतम पारिश्रमिक निर्धारण समितिका सदस्य विमला पाण्डेले श्रमजिवी पत्रकाहरुले व्यक्त गरेका समस्या र सुझाव कार्यान्वयनका लागि समितिले सम्बद्ध निकायमा पहल गर्ने आश्वासन दिएकी छिन् ।

नेपाल पत्रकार महासंघ पर्साका अध्यक्ष अनुप तिवारीको अध्यक्षतामा भएको कार्यक्रममा न्यूनतम पारिश्रमिक निर्धारण समितिका सदस्य गोपाल तिवारी, नेपाल पत्रकार महासंघका केन्द्रिय सचिव दिपेन्द्र चौहान, केन्द्रिय सदस्य केसी लामिछाने, मधेश प्रदेश महासचिव श्याम बन्जारा लगायतले आ–आफनो धारणा राखेका थिए ।