जनकपुर,१३ जेठ । जनकपुरधाममा शपथ ग्रहण बहिस्कार गरेका नवनिर्वाचित वडाध्यक्ष तथा सदस्यहरुले पद तथा गोपनियताको शपथ लिएका हुन् ।शुक्रवार जनपकुरधाम उपमहानगरपालिकामा आयोजित शपथ ग्रहण कार्यक्रममा नेकपा एमालेबाट निर्वाचित वडाध्यक्ष र सदस्यहरुले मेयर मनोज साहबाट पद तथा गोपनियताको शपथ खाएका हुन्।

बिहिवार आयोजित शपथ ग्रहण कार्याक्रम एमालेबाट निर्वाचित जनप्रतिनिधिहरुले बहिस्कार गरेका थिए। उनीहरुले नेपाली कांग्रेसका नेता विमलेन्द्र निधिलाई प्रमुख अतिथि बनाएपछि शपथ ग्रहण बहिस्कार गरेका थिए। एमालेका ७ जना वडाध्यक्ष र सदस्यहरुले शुक्रवार शपथ लिएका हुन्। उनीहरु आजबाट नै कार्यभार समेत सम्हालेका हुन्।

जनकपुरधाम उपमहानगरमा २५ वटा वडा रहेकोमा ११ वटामा नेपाली कांग्रेस, ७ वटामा नेकपा एमाले, दुईवटामा नेपाली कांग्रेसका बागी उम्मेदवार, दुईवटामा लोकतान्त्रिक समाजवादी पार्टी, जनता समाजवादी पार्टी, तराइ मधेश लोकतान्त्रिक पार्टी र नेकपा माओवादी केन्द्रका एकजना वडाध्यक्षमा निर्वाचित भएका छन्।