जनकपुरधाम । धनुषाका दुई पालिकामा प्रमुख पदमा उमेदवारी दिएका ११ जनाले शून्य मत पाएका छन् । क्षिरेश्वरनाथ र मिथिला नगरपालिकाका प्रमुख पदमा उमेदवारी दिएका ११ जनाले शून्य मत पाएका हुन् ।

क्षिरेश्वरनाथमा पालिकाको प्रमुख पदमा उमेदवारी दिएका पाँचजनाले शून्य मत पाएको कार्यालय प्रमुख श्रीधर पन्थीले जानकारी दिए ।उनकाअनुसार स्वतन्त्र उमेदवारी दिएर लौरो चुनाव चिह्न पाएका रामहृदय यादव, खरायो छापका मुकेश यादव, बैडमिन्टन कर्क छापका धिरेन्द्र कुमार साह नुनियार, खानेपानी धारा छाप पाएका सूर्यकुमार यादव र नेपाल सद्भावना पार्टीका सितेश कुमार महतोले शून्य मत पाएका हुन् ।

पालिकामा कुल २५ हजार १६९ मतदाता छन् । जसमध्ये १८ हजार ४५६ मतदान भएको थियो । मतदानमध्ये ४०६ मत बदर भएको छ । नगरमा निर्वतमान नगर प्रमुख एवं नेपाली कांग्रेस धनुषाका सभापति योगेन्द्र पञ्जियारलाई पराजित गर्दै एमालेका सुखदेव यादव निर्वाचित भए ।यस्तै, उत्तरी क्षेत्र मिथिला नगरपालिकामा पनि ६ जना उमेदवारले शून्य मत पाएका छन् । आँप चुनाव चिह्न पाएका मनोजकुमार महतो, जेब्रा चुनाव चिह्न पाएका त्रिपुल कुमार महतो, कैँची चुनाव चिह्न पाएका दानविक्रम थापा, भुइँकटहरका राम सागर महतो, मुडाका हुकुमदेव महतो र हाँस चुनाव चिह्न पाएका राम अवतार चौधरीले शून्य मत पाए ।

मिथिला नगरपालिकामा कुल मतदाता २९ हजार ७९५ छन् । जसमध्ये २२ हजार ३२६ मतदान भएको थियो भने ३५४ मत बदर भएको छ । मिथिला नगरपालिकामा एमालेका राजाराम महतोलाई पराजित गर्दै नेपाली कांग्रेसका महेन्द्र महतो निर्वाचित भएका छन् ।

यी उमेदवारहरूले आफैँलाई पनि मतदान गरेनन् । उनीहरूले सवारी पास र मतगणना स्थलमा प्रतिनिधि पठाउन मात्रै उमेदवारी दिएको बुझिएको छ । यस्ता उमेदवारका कारण मतगणना स्थलमा विवाद पनि हुने गरेका छन् ।