वीरगञ्ज । वीरगञ्ज महानगरपालिकाका निवर्तमान मेयर विजयकुमार सरावगीले अन्य पार्टीबाट तानेर एमाले पार्टी प्रवेश गराएका दुई जना निवर्तमान वडा अध्यक्ष पराजित भएका छन् । अघिल्लो स्थानीय तहको निर्वाचनमा तत्कालिन संघीय समाजवादी फोरमबाट सरावगीसँगै चुनाव जितेका वीरगञ्ज महानगरपालिका वडा नम्बर २५ र २८ का वडा अध्यक्ष यस पटक पराजित भएका हुन् ।
वीरगञ्ज महानगरपालिका वडा नम्बर २५ का बिसराज राउत कुर्मी र २८ की गृजा देवी पराजित भएका हुन् । गत निर्वाचनमा ६ सय ४३ मत ल्याएर वडा अध्यक्षमा निर्वाचित भएका वडा नम्बर २५ का बिसराज यसपटक नेकपा एमालेबाट चुनाव लडेर पराजित भएका छन् । वडा नम्बर २५ मा जसपाबाट चुनाव लडेको आशुतोष चर्तुवेदीसँग कुर्मी ५५ मतले पराजित भएका हुन् । गत निर्वाचनमा नेपाल लोकतान्त्रिक फोरमबाट चुनाव लडी ५ सय ७० मत पाएका चर्तुवेदी यसपटक जसपाबाट वडा अध्यक्षमा निर्वाचित भएका छन् ।
यस्तै वडा नम्बर २८ की गृजा देवी जसपाका सर्युग महतो धानुकसँग २ सय ५४ मतान्तरले पराजित भएकी छिन् । गत निर्वाचनमा १ हजार ३ सय २८ मतले निर्वाचित भएकी गृजा देवीलाई उनकै प्रतिद्वन्दी धानुकले पराजित गरेका हुन् । २०७४ सालको निर्वाचनमा नेपाली कांग्रेसबाट चुनाव लडेका धानुक गृजादेवीसँग १६ मतले पराजित भएका थिए ।
वीरगञ्ज महानगरपालिकाका निवर्तमान मेयर सरावगीले जसपा परित्याग गरेर एमाले प्रवेश गरेसँगै उनले जसपा र अन्य पार्टीबाट चुनाव जितेका २२ जना वडा अध्यक्षलाई एमाले प्रवेश गराउने दावी गरेपनि जम्मा ४ जनालाई मात्रै प्रवेश गराउन सकेका थिए । एमाले प्रवेश गरेका ४ जनामध्ये २ जना पराजित भएपछि उनीहरु अहिले पश्चाताप गरीरहेका छन् ।
