विराटनगर : भारतको जोगवनीदेखि तस्करी गरेर ल्याइएको औषधिलगायतका स्वास्थ्यसामग्री सशस्त्र प्रहरीले विराटनगरबाट बरामद गरेको छ। भन्सार छली गरेर ल्याउँदै गरेको अवस्थामा २ सय ३५ प्याकेट सर्जिकल ब्लेड, २ हजार ७ सय ८० पिस प्रेग्नेन्सी टेस्ट किट र २ सय पिस अक्सिजन फेस मास्क बरामद गरिएको सशस्त्र प्रहरी बल मोरङका प्रमुख एसपी राजकुमार लामिछानेले जानकारी दिए।
उनका अनुसार मोटरसाइकलमा ल्याउँदै गरिएको अवैध सामग्री विराटनगर महानगरपालिका–१५ पारिजातबाट बरामद गरिएको हो।
सशस्त्र प्रहरीलाई देख्नासाथ सामग्री छाडेर तस्करीमा संलग्न भने आइतबार साँझ मोटरसाइकल लिएर फरार बनेको उनले बताए। बरामद गरिएका १ लाख ३० हजार ३ सय रूपैयाँ बराबरको सामग्री आवश्यक कारवाहीका लागि सोमबार विराटनगर भन्सार कार्यालयमा बुझाइएको जानकारी एसपी लामिछानेले दिए।
त्यस्तै जोगवनीबाटै अवैध तरिकाले ल्याउँदै गरेको कपडालगायतका सामान पनि सशस्त्रले बरामद गरेको छ। विराटनगर महानगरपालिका–१६ दरैयाबाट ८३ पिस कुर्ता सलवार, १४ थान बाल्टिन र १ कार्टुन प्लाष्टिकको चम्चा तथा प्लेट बरामद गरिएको जानकारी लामिछानेले दिए।
उनका अनुसार ९५ हजार रूपैयाँ बराबरको तस्करीको सामान कारबाहीका लागि भन्सार कार्यालयमा बुझाइएको छ।
