नेपाल प्रहरीको लागुऔषध नियन्त्रण ब्युरोले सात किलो सेतो हिरोइनसहित दुई जना विदशी नागरिकलाई पक्राउ गरेको छ।
ब्युरोले पक्राउ परेका दुई जनालाई आइतबार पत्रकार सम्मेलन गरी सार्वजनिक गरेको हो।
पक्राउ पर्नेमा ३५ वर्षीया जाम्बियन नागरिक कापुतुला अबिशर्ग र ३५ वर्षीय भारतीय नागरिक लालनुनपुई छन्।
ब्युरोले उनीहरूलाई वैशाख ३ र ४ गते नै समातेको प्रहरी उपरीक्षक जीवनकुमार श्रेष्ठले जानकारी दिए।
लागु औषध ओसारपसार गर्न नेपाललाई यसअघि पनि ट्रान्जिट बनाइएको थियो। त्यसैलाई आधार बनाएर फेरि पनि तस्करी गर्ने समूहले नेपाललाई ट्रान्जिट बनाएर भारत पुर्याउन सक्ने प्रहरीको आशंका थियो।
त्यसक्रममा प्रहरीले एक महिला दक्षिण अफ्रिकाबाट नेपाल आउन लागेको थाहा पाएका थिए।
‘पहिले पनि त्यसरी नै ल्याएको हुँदा हामीले निगरानी गरिरहेका थियौं,’ प्रहरी उपरीक्षक श्रेष्ठले भने।
त्यसक्रममा वैशाख ३ गते बिहान ९:४२ बजे कतार एयरवेजमा दक्षिण अफ्रिकाको जोहानेशबर्गबाट दोहा हुँदै काठमाडौं आइपुगिन् जाम्बियन नागरिक अबिशर्ग।
प्रहरीले सुरूदेखि नै शंका गरिरहेको हुँदा उनको सुटकेशमा जाँच गर्यो।
‘सुटकेशको भित्र र दुई वटा ह्यान्ड ब्यागमा लुकाएर ल्याएको अवस्थामा पायौं सेतो हेरोइन पायौं,’ श्रेष्ठले भने,‘नेपाललाई ट्रान्जिट बनाएर यसरी ल्याएको यो अहिलेसम्मकै सबैभन्दा धेरै मात्रा हो।’
ती महिलाबाट प्रहरीले सात किलो सेतो हिरोइन बरामद गरेको हो। जुन १४ करोड बराबरको भएको उनले बताए।
ती जाम्बियन महिलालाई पक्राउ गरी प्रहरीले थप अनुसन्धान अघि बढाएको थियो।
त्यसक्रममा सो सुटकेश लिन दिल्लीबाट अर्कै व्यक्ति आउँदै गरेको खुल्यो।
जाम्बियन महिला पक्राउ परेको भोलिपल्टै भारतबाट लालनुनपुई आएका थिए। उनी आइसकेको थाहा पाएपछि प्रहरीले काठमाडौं महानगरपालिका-२को लाजिम्पाटस्थित एक होटलबाट नियन्त्रणमा लिएको थियो।
प्रहरी उपरीक्षक जीवनकुमार श्रेष्ठका अनुसार भारतीय महिला लालनुनपुई यसअघि पनि लागु औषध तस्करीमा संलग्न थिए।
तर जाम्बियन नागरिक अबिशर्ग भने पहिलो पटक यस काममा संलग्न भएकी हुन्।
भारतीय महिलाको ट्राभल हिस्ट्री पनि थुप्रै रहेको ब्युरोले जनाएको छ। उनी भारतको एक होटलमा काम गर्थिन्।
यता जाम्बियन नागरिक अबिशर्ग भने स्नातक पढ्दै गरेकी विद्यार्थी हुन्।
प्रहरीलाई ती महिलाले आफ्नो झोलामा लागु औषध भएको बारे थाहा नभएको बताएकी छन्। तर प्रहरीले भने यसबारे उनी जानकार नै भएको बताएकी छन्।
उनलाई नेपालमा आफ्ना प्रेमीले पठाएका थिए। प्रेमीकै भनाई अनुसार उनी नेपाल आइपुगेको बताएकी छन्।
यस्तै प्रेमी भने केही दिन पछि मात्रै नेपाल आउने र घुम्ने योजना बनाएको प्रहरीले जनाएको छ।
उनीहरू दुई वर्षदेखि प्रेममा रहेको प्रहरीलाई बताएकी छन्।
नेपाल आएर उनीहरू मे २ तारिकमा मात्रै फर्किने टिकट रहेको ब्युरोले जनाएको छ।
‘आफ्ना प्रेमीले भने अनुसार नै सुटकेश कसलाई दिनेदेखि कहाँ जाने सबै भनिएको छ,’ प्रहरी उपरीक्षक श्रेष्ठले भने, ‘उनलाई आफ्नो झोलामा लागुऔषध छ भन्ने कुरा थाहा नहुने कुरा नै हुन्न।’
प्रहरीले यसमा थप अनुसन्धान अघि बढाएको छ।
उनीहरूमाथि प्रहरीले लागु औषध (नियन्त्रण) ऐन २०३३ बमोजिम सेतो हेरोइन मुद्दामा म्याद थप गरी अनुसन्धान अघि बढाएको छ।
