काठमाडौं । नेपाल बैंकर्स संघले आगामी एक सातासम्मका लागि अत्यावश्यकबाहेक अन्य वस्तुको प्रतितपत्र (एलसी) नखोल्ने निर्णय गरेको छ । अर्थतन्त्र थप जोखिममा परेपछि विलासिताका वस्तु आयातका एलसी नखोल्न संघले निर्णय गरेको हो । राष्ट्र बैंकले गत सोमबार बैंकका सीइओलाई बोलाएर गाडी सहितका बिलासिताको वस्तुको एलसी रोक्न मौखिक निर्देशन दिएको थियो ।
उक्त निर्देशन अनुसार नगद मार्जिन तोकेका ४७ समुहका वस्तुको एलसी तत्काललाई नखुल्ने भएका हुन् । जसमा नगद मार्जिन तोकेका चिनी, चकलेट, चुइगम, इनर्जी ड्रिङ्क, चुरोट, अत्तर, शृङ्गारका सामाग्री, स्याम्पु, कपालमा लगाउने तेल, गाडी तथा मोटरसाइकल, काठका सामग्री र फर्निचर, जुत्ता, टोपी, छाता, कृत्रिम फूल, मार्बल, ट्वाइलेट र भान्छा कोठाका सामाग्री, सुनचाँदी लगायत पर्छन् ।
सुनको एलसी रोक्दा यसको नकारात्मक असर पर्ने नेपाल सुनचाँदी व्यवसायी महासंघका पूर्वअध्यक्ष माणिक रत्न शाक्य बताउँछन् । उनी भन्छन्, ‘सुनको आयात प्रतितपत्र (एलसी) रोक्न निर्णयले सुनको बजारमा नकारात्मक असर पर्ने देखिन्छ । बजारमा सुनको अभाव हुन थाल्यो भने सुनको कारोबार वैध च्यानलबाट भन्दा पनि अवैध च्यानलबाट बढी हुनसक्छ । यसलाई रोक्नका लागि सरकारले बेलैमा सोच्नु पर्ने हुन्छ ।’
तर, मुलुकको अर्थतन्त्र संकटमा रहेका कारण केहि हप्तासम्म सुन आयात रोकिएपनि स्टक सुनले बजारको माग धान्ने तयारीमा व्यवसायी रहेको उनले बताए । अध्यक्ष शाक्यले भने, ‘देशको अर्थतन्त्र अहिले संकटमा रहेको छ । अर्थतन्त्र खराव हुँदा व्यापार ठिक हुन्छ भन्न सकिदैन । त्यसैले आफूसंग भएको स्टकहरुलाई नै व्यवस्थापन गरेर बजारको मागलाई कहि दिनसम्म धान्न सक्छौं । केहि समयका लागि हामी धैर्य गर्नेछौं ।’
उनले अहिले ठ्याक्कै यतिकै मात्रामा सुन स्टक छ भन्न सकिने स्थिति नरहेको बताए । तर, १५ दिनसम्म सुन आयात नभएपनि बजारको मागलाई धान्न सकिने अनुमान रहेको अध्यक्ष शाक्यको भनाई छ ।गत महिना नेपाल राष्ट्र बैंकले दैनिक आयात गर्न सकिने सुनको परिमाण २० किलोबाट झारेर १० किलोमा पुर्याएको थियो ।
त्यस्तै, शाक्यले अहिले बजारमा सुनको माग बढ्न थालेको जानकारी दिए । उनले भने, ‘बैशाख महिनामा पनि विवाहका सिजन मानिन्छ । यसले गर्दा पनि अहिले विस्तारै सुनको माग बढिरहेको छ ।’ उनले चैत्र महिनामको सुरुवातमा सुनचाँदीको कारोबार सुस्ताए पनि अहिले भने निरन्तर बढ्दो क्रममा रहेको बताए । अध्यक्ष शाक्यले भने, ‘चैत्र महिनाको सुरुवातमा दैनिक १५ केजीसम्म सुनको कारोबार हुने गरेको थियो । तर, अहिले दैनिक कारोबार बढिरहेको छ । अहिले दैनिक २० देखि २५ केजीको हाराहारीमा सुनको कारोबार भइरहेको छ ।’
