वीरगन्ज । हेटौँडा महानगरपालिकामा सत्ता गठबन्धन र नेकपा (एमाले)–राष्ट्रिय प्रजातन्त्र पार्टी (राप्रपा) नेपालको गठबन्धनबीच प्रतिष्पर्धा हुने सम्भावना बढेको छ ।
अघिल्लो निर्वाचनमा नेपाली कांग्रेस र नेकपा (माओवादी केन्द्र)को गठबन्धन हुँदा पनि एमाले विजयी भएको हेटौँडामा सत्ता गठबन्धन र एमाले–राप्रपा नेपाल गठबन्धनबीच प्रतिष्पर्धा हुने देखिएको हो ।
राप्रपा नेपालका महामन्त्री राजाराम बर्तौलाले एमालेसँग तालमेल गरेर जाने सैद्धान्तिक सहमति भइसकेको र केही दिनमा नै लिखित सहमति हुने दाबी गरे ।
उपमेयरमा राप्रपा नेपालको दाबी
राप्रपा नेपालले उपमेयर र केही वडाका अध्यक्ष आफूहरूलाई दिनुपर्ने सर्त राखेको छ । एमालेलाई मेयरमा सघाउने र आफूले उपमेयरसहित केही वडा पाउनुपर्ने उनको भनाइ छ ।
“हामीले हेटौँडाको मेयरमा एमालेलाई सहयोग गर्छौं । उपमेयर र केही वडामा हाम्रो दाबी छ,” उनले भने ।
गठबन्धनलाई सहज छैन
२०७४ को स्थानीय निर्वाचनमा हेटौँडा उपमहानगरपालिकामा नेपाली कांग्रेस र माओवादी केन्द्रबीच गठबन्धन बन्यो । दुई दलबीच गठबन्धन हुँदा पनि नेकपा एमाले ६१५ मतले विजयी भएको थियो ।
एमालेका हरिबहादुर महतले २३ हजार १२४ मत ल्याएका थिए भने गठबन्धनबाट कांग्रेसका आनन्दराम पराजुलीले २२ हजार ५०९ मत मात्रै पाएका थिए ।
एमालेले १२ वडामा जित निकालेको थियो । वडा नम्बर २, ३, ४, ७, ८, ९, १०, ११, १२, १३, १७, १८ र १९ मा एमालेका उमेदवार विजयी भएका थिए । कांग्रेसले १, ५, ६, १५, १६ गरी ५ वटा वडामा जित निकालेको थियो । माओवादी केन्द्र भने १४ वडामा सीमित भएको थियो । त्यस्तै तत्कालीन संघीय समाजवादी फोरमले हेटौँडामा एक हजार भन्दा बढी मत ल्याएको थियो । उक्त दल हालको जसपा हो । जसपा सत्ता गठबन्धनमा छ ।
अबको निर्वाचनमा सत्ता गठबन्धन निर्वाचनमा होमिँदै छ । मकवानपुर जिल्लामा सत्ता गठबन्धनका दलहरूबीच गठबन्धनबाटै चुनाव लड्ने सहमति भइसकेको छ । तर, अघिल्लो निर्वाचनमा कांग्रेस र माओवादी मिल्दा पनि पराजित भएका दलहरूलाई एमाले र राप्रपा नेपालको गठबन्धनसँग सहज भने छैन । अघिल्लो निर्वाचनमा राष्ट्रिय प्रजातन्त्र पार्टी (राप्रपा)ले हेटौँडामा झण्डै ७ हजार मत ल्याएको थियो । राप्रपाका मधुकरप्रसाद अधिकारीले ६ हजार ८५७ मत ल्याएका थिए ।
तर, एमाले र राप्रपा अहिले विभाजित छ । एमालेबाट विभाजित भएको नेकपा (एकीकृत समाजवादी) सत्ता गठबन्धनमा छ ।
त्यस्तै राप्रपाबाट विभाजित भएको दल राप्रपा नेपाल एमालेसँँग तालमेलको तयारीमा छ । राप्रपा नेपाल पनि पहिलेको तुलनामा निकै कमजोर छ । राप्रपाबाट जितेका अधिकारी राप्रपामा नै छन् ।
तर, बर्तौला राप्रपा नेपाल कमजोर नरहेको जिकिर गर्छन् ।
“पहिलेको जनमत घट्दैन । बरु मत धेरै आउँछ । कमल थापा जता उभिने उता मत आउने भन्ने हुन्छ । न्युट्रल मत पनि हाम्रै पार्टीलाई आउँछ,” उनको दाबी छ ।
केन्द्रको निर्णयको पर्खाइमा गठबन्धन, एमाले सिफारिसको तयारीमा
सत्ता गठबन्धनका नेताहरू भने केन्द्रको निर्णयको प्रतिक्षामा छन् । सत्ता गठबन्धनले हालसम्म भागबण्डा गरिसकेको छैन ।
हालका मेयर महतले दोहोरिने इच्छा व्यक्त गरेका छन् । बाह्रखरीसँगको कुराकानीमा एमालेका आफूले मेयरमा पुनः दाबी गरेको बताए । हेटौँडा एमालेमा सर्वसम्मत रूपमा उमेदवार सिफारिस नहुने देखिएको छ । एमालेले महतसहित अनन्त पौडेल लगायतको नाम सिफारिस गर्ने तयारी गरेको एक नेताले जानकारी दिए ।
आफ्नै उमेदवार उठाउने तयारीमा राप्रपा
एमाले र राप्रपाबीच गठबन्धन सक्ने आकलन पनि भइरहेको छ । राप्रपाका प्रवक्ता मोहन श्रेष्ठले तालमेल गर्ने भन्दा पनि आफ्नै उमेदवार बनाउने तयारी रहेको बताए ।
“सम्मानजनक प्रस्ताव आए छलफल गर्न सकिन्छ । तर, हामीले अहिले कुनै तालमेलको सोच बनाएको छैन । आफ्नै तागतमा उमेदवारी दिने तयारी छ,” उनले भने ।
एमालेले राप्रपा नेपालसँग गठबन्धन गरे आफू सो गठबन्धनमा सहभागी नहुने उनले बताए । हेटौँडामा राप्रपा नेपाल कमजोर रहेको र आफूहरूको शक्ति रहेको उनको जिकिर छ ।
“हेटौँडामा अघिल्लो निर्वाचनमा हामीले ७ हजार मत ल्याएका थियौँ । हामी त्यहाँ निर्णायक हौँ । कमल थापाको गृह जिल्ला भए पनि कार्यकर्ताको साथ राप्रापामा छ,” उनले जिकिर गरे ।
राप्रपाले यो निर्वाचनमा पनि अघिल्लो निर्वाचनका पराजित उमेदवार मधुकरप्रसाद अधिकारीलाई उमेदवार बनाउने तयारी गरेको छ ।
