काठमाडौं । चैत २७ गते त्रिभुवन अन्तर्राष्ट्रिय विमानस्थलबाट १ राउण्ड गोली सहित प्रहरीले एक युवतीलाई प्रहरीले नियन्त्रणमा लियो। तनहुँ भानु नगरपालिका-७ की २७ वर्षीया सोविता नेपालीलाई आइतवार राति पक्राउ गरेको प्रहरीले जानकारी दिएको छ।
नेपाल एयरलाइन्सको उडानबाट काठमाडौंबाट मलेसिया हुँदै जापानको नारिता जान लागेकी थिइन् उनी। तर, विमानस्थलमा खटिएको प्रहरीले जाँच गर्ने क्रममा उनको झोलामा गोली फेला पारेको भन्दै नियन्त्रणमा लियो।
उनले बोकेको घ्यू रंगको लेडिज हाते व्यागलाई विमानस्थलको अन्तर्राष्ट्रिय उडानतर्फको प्रस्थान होल्ड ब्यागेज चेकिङ एक्स- रे ‘ए’ मा चेकजाँच गर्ने क्रममा कालो रंगको वालेटभित्र केएफ 13 5.56 लेखिएको गोली राउण्ड- १ (एक) फेला परेको हो।
उनले झोलाभित्र किन गोली लिएर गइन् भन्ने विषयको अनुसन्धान प्रहरीले गरिरहेको छ। महानगरीय प्रहरी वृत्त गौशालामा राखेर उनीमाथि अनुसन्धान भइरहेको छ। जिल्ला अदालतबाट म्याद थप गरेर अनुसन्धान भइरहेको वृत्तका प्रमुख केशव भट्टराईले बताए।
उनले घरमा भेटिएको गोली पर्समा साना नानीहरुले हाल्दिएको र आफुले झिक्न बिर्सिएको बयान दिएकी छिन्। गोलीको गलामा माला बनाएर पनि लगाइने चलन रहेको छ। उनले पनि गोलीको माला बनाएर लगाउनको लागि लगिएको खुलेको छ।
प्रहरीले बरामद गरेको गोली प्रयोग भइसकेको तर नपड्किने प्रकारको भएको खुलेको छ। १० वर्षे जनयुद्धका क्रममा लुकाएका, फ्यालिएका हतियारका अवशेष अहिले पनि गाउँघरमा भेटिने गरेका छन्। त्यसैले कुनै ठाउँमा प्रयोग भएका वा नभएका गोली भेटिने सम्भावना हुन्छ।
घटनाको थप अनुसन्धान भइरहेको प्रहरीले जानकारी दिएको छ।
२०७७ पुषमा पनि विमानस्थलबाट ५० थान गोली भेटिएको थियो। विमानस्थलको चेकिङमा झापा मेची नगर नगरपालिका २ का २० वर्षीय बद्रीहाङ राई गोली सहित पक्राउ परेका थिए। साढे १२ बजेको श्री एयरलाइन्सको फ्लाइटबाट उनी झापाको भद्रपुर जाँदै गर्दा उनले बोकेको झोलाभित्र लुगामा राखिएको नाइन एमएमको ५० राउण्ड गोली बरामद भएको थियो।
राईले बोकेको झोलाभित्र प्रहरीको ज्याकेट थियो। त्यही ज्याकेटभित्र भेटिएको हो चम्किलो गोली। समातिएका बद्रीका बुबा अवकाशप्राप्त प्रहरी हुन्। उनका बुबाले प्रहरी नायव निरीक्षक (सई) बाट अवकाश पाएका थिए। पक्राउ परेका युवकले आफूलाई ज्याकेटभित्र गोली भएको थाहा नभएको तर आफुलाई बुबाले ज्याकेट ल्याइदिनु भनेको बयान दिएपछि बुबा पनि अनुसन्धानमा तानिएका थिए।
