सत्ता गठबन्धन बैठक : महानगरको विवाद कायमै नगर र गाउँपालिका प्रदेश र जिल्लाले टुंग्याउने
काठमाडौं– बालुवाटारमा बसेको सत्ता गठबन्धनको बैठकमा सत्तारुढ दलहरुबीच महानगर र उपमहानगर मात्र केन्द्रले टुंग्यउने र नगर तथा गाउँपालिका प्रदेश, जिल्ला र नगर/पालिकास्तरबाटै टुंग्याउने सहमति भएको राष्ट्रिय जनमोर्चाका नेता हिमाल पुरीले बताए।

‘महानगर र उपमहानगर केन्द्रबाट टुंग्याउने सहमति सत्तारुढ गठबन्धनबीच भएको छ,’ उनले भने, ‘अब नगरपालिका प्रदेशस्तरबाट, गाउँपालिका जिल्लास्तरबाट र वडाको हकमा पालिकास्तरबाटै सबै दलको सहमतिमा उम्मेदबार टुंग्याइनेछ।’ यसका लागि मंगलबार बस्ने शीर्ष नेताहरुको वैठकले मापदण्ड तय गर्ने उनले बताए। सोही मापदण्डका आधारमा उम्मेवार टुङ्गो लाग्ने उनले बताए।

उनले सबै तहमा सबै दलले सम्मानजक रुपमा स्थान पाउनुपर्ने कुरा आफूहरुले राखेको र सबै दलको धारणा यस्तै रहेको उनले बताए। उनले पहिलाको परिस्थिति र अहिलेको परिस्थिति उस्तै नरहेकाले त्यसमा पनि दलहरु विचार गरेर मापदण्ड निर्धारण गर्नुपर्ने कुरा आफूहरुले राखेको उनले बताए।

सत्तारुढ दलहरुकोे सोमबार बसेको बैठकले सत्ता गठबन्धनको उम्मेदवारलाई विजयी गराउन भने साझा अपिल गरेका छन्।उनीहरुले आगामी निर्वाचनमा गठबन्धनबाटै उम्मेदबार तय हुने कुराको सन्देश दिनका लागि एक विज्ञप्ति जारी गरेको देखिन्छ।
प्रमुख प्रतिपक्ष नेकपा एमालेले धमाधम आफ्नो उम्मेदवारको नाम सार्वजनिक गर्न थालेपछि सत्ता गठबन्धन भने विवादमै रहेको छ।

सत्तारुढ दलहरुका बीचमा सवैभन्दा धेरै विवाद महानगरको उम्मेदवारमा देखिएको छ। ६ महानगरमध्ये ३÷३ गर्नुपर्ने पक्षमा कांग्रेसबाहेक दलहरु देखिएका छन्। तर, कांग्रेसले ४ महानगरबाट तल झर्न नसकिने भन्दै आएको छ। कांग्रेसले काठमाडांै, ललितपुर, भरतपुर र पोखरामा दावी गरिरहेको छ। माओवादी केन्द्रले भरतपुर माग गरेको छ भने एकीकृत समाजवादीले पोखरा दावी गरिरहेको छ। त्यस्तै, वीरगञ्जमा जसपाले माग गरेको छ।