काठमाडौं : नेकपा एमालेका अध्यक्ष केपी शर्मा ओलीले वर्तमान सरकार रहिरहेमा देश बर्बादीतिर धकेलिने बताएका छन्। बुधवार नेपाल राष्ट्रिय उद्योग व्यवसाय महासंघको दोस्रो राष्ट्रिय महाधिवेशनलाई सम्बोधन गर्दै ओलीले अहिले देशमा लगानीको कुनै सम्भावना नरहेको उल्लेख गर्दै वर्तमान सरकार रहिरहेमा देश बर्बादीतिर धकेलिने बताएका हुन्।
उनले बैंकसँग पनि लगानीको लागि दिने पैसा नभएकाले देश संकटमा रहेको बताए।
‘खल्तीमा कसैको पैसा हुँदैन। बैंक त्यसैकारण खोलेका हुन्। कुनैपनि नयाँ उद्योग, व्यवसाय सुरु गर्दा बैंकबाट लोन लिनुपर्छ। दिनुपर्छ बैंकले। नयाँ लगानीका लागि कुनै सम्भावना छैन यतिखेर किनभने बैंक पैसा दिन सक्दैन। बैंक पैसा दिन सक्ने अवस्थामा छैन। यो सरकार तुरुन्तै, तुरुन्तै, तुरुन्तै ढलेन भने जतिदिन रहन्छ त्यति बढी देशलाई बर्बादीतिर धकेल्छ,’ ओलीले भने।
पछिल्लो समय गठबन्धनविरुद्ध ‘तुच्छ’ शैलीमा प्रस्तुत भएका ओलीले आज गठबन्धन सरकार ‘कुहिएर झर्ने’ बताए।
‘अहिलेको यो गठबन्धन सरकार कहिलेसम्म रहन्छ भन्ने यो कुहि सकेको छ। तर कुहिएको फल पनि कुहियो भन्नेबित्तिकै खत्रक्क झर्दैन। त्यो झर्नलाई मज्जाले कुहिसक्नु पर्छ। यो कुहिदैछ। यो झर्ने बेलातिर जाँदैछ। यो झर्छ। झर्ने समय हामीले पर्खिनुपर्छ। कसैले पनि मान्छे मर्नै लागेको, बाँच्दै, बाँच्दैन त्यो भनेपनि त्यसलाई प्वाक्क हिर्काएर त्यतिबेरै मर्यो भने त्यसलाई ज्यान मुद्दा उसैगरी लाग्छ्’ ओलीले भने।
उनले सरकार ढाल्न आफुहरुले कोसिस नगर्ने स्पष्ट भन्दै एमालेको ध्यान सबै चुनावमा केन्द्रित भएको बताए।
‘यो सरकार ढाल्न त हामी कोसिसै गर्दैनौँ। यो ढालेको बात पनि नलागोस् क्या। यो आफैँ झरोस्। कुहिएर फतक्क झरोस्। त्यसो भएर हामी अहिले सरकारको बारेमा कतै ध्यान दिइराखेको छैनौँ। चुनावमा ध्यान दिइराखेका छौँ।’
कार्यक्रममा ओलीले मुलुकको विकास र समृद्धिका लागि उद्योगीव्यवसायीहरुले नेतृत्व लिनुपर्ने बताए। उनले अहिले हामीले हाम्रै आवश्यकता लागि किन्ने सामान नेपालमा नै बनेको हुनुपर्ने समेत बताए।
‘हामीले कच्चापदार्थ होइन, रुपान्तरित र प्रशोधित गरेको सामान बजारमा पठाउनुपर्छ’, उनले भने, ‘कच्चा होइन, प्रतिस्पर्धात्मक गर्ने खालको सस्तो र गुणस्तरीय सामान हामीले उत्पादन गर्नुपर्छ।’
