वीरगञ्ज | वीरगञ्जमा प्रतिलिपि अधिकार सम्बन्धी कानुन कार्यान्वयनको अवस्था र सुधारका क्षेत्रहरु एवम् स्रष्टाले प्राप्त गर्ने रोयल्टी विषयक एकदिवसीय अन्तरक्रिया कार्यक्रम सम्पन्न भएको छ । नेपाल सरकारको मातहतमा रहेको नेपाल प्रतिलिपि अधिकार रजिष्ट्रारको कार्यालयले अन्तरक्रिया कार्यक्रमको आयोजना गरेको हो । कार्यालयकी रजिष्टार बिष्णुकुमारी भट्टराईको अध्यक्षतामा भएको कार्यक्रममा पछिल्लो समयमा प्रतिलिपि अधिकार चुनौतीको विषय बन्दै गएको वक्ताहरुले बताएका थिए ।
कार्यक्रमलाई सम्बोधन गर्दै पर्सा जिल्ला अदालतका न्याधिश बिष्णुप्रसाद अर्यालले स्रष्टा एवम् सर्जकहरुका सृजना चोरी हुने र कपी हुने प्रवृति बढ्दै गएकोमा चिन्ता व्यक्त गरे । अहिले आफै मेहनत गर्नेभन्दा पनि अरुको कपी गर्ने प्रवृतिले व्यक्तिलाई मात्रै नभएर सिंगो समाजलाई नै हानी हुने न्याधिश अर्यालको भनाई छ ।
नेपाल प्रतिलिपि अधिकार रजिष्ट्रारको कार्यालयकी रजिष्टार बिष्णु कुमारी भट्टराईले प्रतिलिपि अधिकारको परिचय, प्रतिलिपि अधिकारको संरक्षण गर्नुपर्ने आवश्यक्ता, प्रतिलिपि अधिकार प्रणाली र यसका अन्य पाटोहरुको बारेमा प्रकाश पारेकी थिइन् । प्रतिलिपि अधिकार हनन्मा पर्ने उजुरीको अनुसन्धान अभियोजनका पक्षहरुका बारेमा जिल्ला प्रशासन कार्यालय पर्साका प्रमुख जिल्ला अधिकारी उमेश कुमार ढकालले प्रस्तुती प्रस्तुत गरेका थिए ।
कार्यक्रममा सहभागी साहित्यकार तथा सर्जकहरुले रोयल्टीको कार्यन्वयवन, प्रतिलिपि अधिकारको संरक्षण सम्बन्धमा जिज्ञासा राखेको कार्यक्रममा सहभागी युवा कवियत्री प्रिया मिश्राले बताइन् । कार्यक्रममा जिल्लास्थित विभिन्न सरकारी कार्यालयका प्रमुख, समाजसेवी, बुद्धीजिवि एवम् साहित्यकारहरुको सहभागिता रहेको थियो ।
