महोत्तरी । गत फागुन १० गते राती घरबाटै बेपत्ता पारिएका महोत्तरीको पिपरा गाउँपालिकाका झा दम्पतीको शव फेला परेको छ ।

जिल्लाको पिपरा गाउँपालिका वडा नम्बर–५ सहोड़वाबाट अपहरित ६५ वर्षीय मुसाफिर झा र उनकी ५८ वर्षीया श्रीमति गीतादेवी झाको शव महोत्तरीकै पिपरा गाउँपालिका–२ स्थित अतरार जाने बाटोमा बोराभित्र माटोमुनि पुरिएर राखेको अवस्थामा फेला परेको हो ।

दुईवटा बोरामा हत्या गरेर माटो मुनि पुरिएको अवस्थामा दुबैजनाको शव बरामद भएको जिल्ला प्रहरी कार्यालय महोत्तरीका प्रहरी उपरिक्षक दिनेश आचार्यले जानकारी दिए ।

दुबै शवको शरीरको हड्डीहरु मात्र देखिएको छ । कपडाको आधारमा परिवारजनले दुबै शवको पहिचान गरेको छ । एसपी आचार्यले भने,‘अपहरण गरिएको राती उनीहरुले सोहि कपडा लगाएको आधारमा परिवारजनले शवको पहिचान गरेका छन् ।’सीआईबी, महोत्तरी प्रहरी र प्रदेश २ प्रहरी टोली घटनास्थलमा अनुसन्धान गरिरहेको छ ।