रौतहट |रौतहटको मौलापुरमा मधानी महायज्ञको फागुन १७ गते हुने उदघाटन समारोहमा पुर्व प्रधानमन्त्री देखि नेपाली र भारतिय सिने जगतका सुपरस्टारहरुको ओईरो लाग्ने भएको छ । मँगलबार १७ गतेहुने उदघाटनको लागि सम्पुर्ण तयारी पूरा भैसकेको आयोजकले जनाएको छ ।रौतहट लगायत तराई क्षेत्रमा मनाईने भगवान शिवको विशेष अनुष्ठानको रुपमा रहेको मधानी महायज्ञको विश्वव्यापी प्रचार गर्न पुरातात्विक महादेव मन्दिर प्राङ्गणमा हरेक वर्ष नगरपालिकाले महायज्ञको आयोजना गर्दै आएको छ । शिवरात्रीको विशेष अवसरमा आयोजना हुने मधानी महायज्ञको उद्घाटन पूर्वप्रधानमन्त्री तथा नेकपा एमालेका अध्यक्ष केपी शर्मा ओलीले गर्ने कार्यक्रम रहेको छ । महायज्ञमा नेपालका विशिष्ठ श्रेणीका राजनीतिक व्यक्तित्व सहभागी हुने देखि नेपाली तथा भारतीय चर्चित कलाकारहरुको सांस्कृतिक प्रस्तुति रह्ने आयोजकले जनाएको छ । महायज्ञको उदघाटन समारोहमा नेपाली सिनेजगतका सुपरस्टार राजेश हमाल,भारतिय भोजपुरी सुपरस्टार खेसारीलाल यादव र रानी चटर्जी,भोजपुरिया गायक सुनिल पंडित सँगै नेपाली तथा भारतीय दर्जनौं कलालकारहरुले प्रस्तुति गर्ने कार्यक्रम रहेको छ ।

झन्डै २ हजार वर्षभन्दा पुरानो पुरातात्त्विक महादेव मन्दिर केही वर्षअघि मौलापुर ५ पतौरास्थित स्थानीयले बारी खन्ने क्रममा भेटेको थियो । लगत्तै पूर्वमन्त्री प्रभु साहको पहलमा पुरातत्त्व विभागद्वारा उक्त मन्दिरको उत्खनन गर्दा सुरुमा महादेव मन्दिर १३औं सताब्दी भन्दा पहिलेको रहेको ठहर गरिएको थियो । पछि मन्दिरमा विभागले गौतम बुद्धको जन्मभूमि लुम्बिनी तिलौराकोटमा भेटिएका अवशेषसंग मिल्दो अवशेष भेटेपछि मन्दिर २ हजार वर्षभन्दा पुरानो रहेको अनुमान गर्दै थप उत्खनन जारी राखेको छ ।

मौलापुर नगरपालिकाकी मेयर रीनाकुमारी साहको पहलमा उक्त महादेव मन्दिरलाई ब्यवस्थित गरी महाशिवरात्रीको अवसरमा पछिल्लो तीन वर्षदेखि मधानी महायज्ञ भब्यताका साथ आयोजना हुँदै आएको छ । मधानी महायज्ञको पहिलो वर्ष राष्ट्रपति विद्यादेवी भण्डारीबाट उद्घाटन गरिएको थियो भने दोस्रोपटक गत वर्ष तत्कालीन उपप्रधानमन्त्री इश्वर पोखरेल प्रमुख अतिथिका रुपमा सहभागी थिए ।

महायज्ञको अवसरमा मौलापुरमा पुरातात्त्विक महादेव मन्दिरमा सर्लाही, बारा, रौतहटलगायत सीमावर्ती भारतीय क्षेत्रबाट हजारौँ भक्तजन जल चढाउन आउने गर्दछन् । कतिपय स्थानीयवासीले पुर्ण निष्ठाका साथ भारतबाट गंगा जल ल्याएर उक्त मन्दिरमा चढाउने गरेका छन् । मधानी महायज्ञको अवसरमा मौलापुर पतौरा स्थित लाग्ने सप्ताह ब्यापी मेलामा हुनेगरेको धार्मिक तथा सांस्कृतिक कार्यक्रममा लाखौं मानिसको सहभागिता हुनेगर्दछ । यसपटक मधानी महायज्ञको उदघाटनको कार्यक्रम तथा मेलालाई ब्यवस्थित एवं सुरक्षीतरूपमा सफल बनाउन दर्जनौं स्वंयशेवकका साथै सैयौं सशस्त्र र नेपाल प्रहरी लगायत परिचालन गरिने आयोजक मौलापुर नगरपालिकाले जनाएको छ ।