पर्सा | पर्सा राष्ट्रिय निकुञ्जमा यस वर्ष पनि साइकिलिंङ कार्यक्रम हुने भएको छ। महाशिवरात्री तथा नेपाली सेना दिवसको अवसरमा फागुन १७ गते राष्ट्रिय निकुञ्जभित्र साइकिलिङ कार्यक्रम तय भएको वन रेञ्जर लालबाबु साहले जानकारी दिए।

रेञ्जर साहका अनुसार मधेश प्रदेशको एक मात्र पर्सा राष्ट्रिय निकुुञ्जलाई पर्यटकीय क्षेत्रको रुपमा विकास गर्न साइकिलिङ प्रतियोगिता आयोजन गर्न लागिएको हो। राष्ट्रिय निकुञ्ज भित्रको आधारभार, हलखोरिया, हात्तीसयर जंगल फायरलेन क्रस कन्ट्री गरी ३९ किलोमिटर साइकिलिङ हुने साहले जानकारी दिए।

पर्सा निकुञ्जमा गत वर्षपनि साइकिलिङ प्रतियोगिता आयोजना गरिएको थियो। गत वर्षभन्दा यस वर्ष प्रतियोगिता भव्य रुपमा मनाउने लक्ष्यसहित निकुञ्जका प्रमुख संरक्षण अधिकृत लगायतका कर्मचारीहरु दिन रात खटिरहेका छन्।

साइकिलिङ कार्यक्रमको लागि प्रदेश सरकार र वीरगञ्ज महानगरपालिकाले आर्थिक सहयोग गरेका छन्।प्रतियोगितामा दुई सयभन्दा बढी संख्यामा साइकल राइडर सहभागि हुने साहले जानकारी दिए। आफू प्रमुख संरक्षण अधिकृतको रुपमा निकुञ्जमा आएपछि पर्यटन प्रवद्र्धनका लागि विभिन्न कार्यक्रम गर्दै आएका साहले बताए।