बारा | बारामा तीन जना सवार मोटरसाइकल दुर्घटना हुँदा दुई जनाको मृत्यु भएको छ। शनिबार राती साढे ८ बजेको समयमा बाराको कोल्हवी नगरपालिका –१ मा ना४२प ८०२३ नम्बरको मोटरसाइकल दुर्घटनामा परेको थियो।

दुर्घटनामा परी कोल्हवी नगरपालिकाकै २० वर्षीय सागर चौधरी र १९ वर्षीय मदन चौधरीको मृत्यु भएको प्रहरीले जनाएको छ। दुवै जनाको उपचारको क्रममा वीरगञ्जमा मृत्यु भएको बाराका प्रहरी प्रवक्ता प्रहरी नायब उपरीक्षक गौतम मिश्रले जानकारी दिए।

दुर्घटनामा परी २० वर्षीय अशोक चौधरी घाइते भएका छन्। उनको वीरगञ्जस्थित नारायणी अस्पतालमा उपचार भइरहेको छ। कोल्हवीबाट श्रीपुरतर्फ जाँदै गरेको मोटरसाइकल आफै अनियन्त्रित भई सडकछेउमा रहेको स्वास्थ्यचौकीको भवनमा ठोक्किएको जिला प्रहरी कार्यालय बाराले जनाएको छ।