वीरगंज । ‘मेरो गणना, मेरो सहभागिता’ भन्ने नाराका साथ बिहीबारदेखि राष्ट्रिय जनगणना २०७८ शुरु भएको छ । जनगणनाका लागि पर्सा जिल्लामा ५ सय ७० जना गणक खटाइएको जिल्ला जनगणना कार्यालय पर्साका जनगणना अधिकारी केशव ज्ञवालीले जानकारी दिए । कार्तिक २५ गतेदेखि शुरु भएको जनगणना मंसिर ९ गतेसम्म चल्नेछ । प्रभावकारी रुपमा जनगणना गर्नका लागि पर्सा जिल्लामा ६ वटा जनगणना कार्यालय स्थापना गरिएको छ ।
वीरगंज महानगरपालिकामा जिल्ला जनगणना कार्यालय पर्सा र परवानीपुरमा कार्यालय स्थापना गरिएको छ । यस्तै सखुवाप्रसौनी गाउँपालिकालाई समेत हेर्ने गरी पर्सागढी नगरपालिकामा कार्यालय स्थापना गरिएको छ । ठोरी, जगरनाथपुर, पटेर्वासुगौली र जिराभवानी गाउँपालिकाको लागि जिराभवानीको सेढवामा स्थापना गरिएको छ । धोबिनी, पकाहमैनपुर र छिपहरमाई गाउँपालिकाको लागि कालिकामाई गाउँपालिकाको मुड्लीमा कार्यालय स्थापना गरिएको अधिकारी ज्ञवालीले बताए ।
जनगणनाको पहिलो चरणमा सुपरिवेक्षकले घर सङ्ख्या, परिवार सङ्ख्या, कृषि विवरण, आर्थिक गतिविधि, बैङ्क खाता आदिका बारेमा सामान्य विवरण सङ्कलन गरी घरको सूचीकरण गरिसकेको र सूचीकरण पश्चात् दोस्रो चर गणकले जात, धर्म, संस्कृति, शैक्षिक विवरण, आर्थिक गतिविधि, मृत्युसँग सम्बन्धित विवरण जस्ता विवरण सङ्कलन शुरु गरिएको जिल्ला जनगणना प्रमुख ज्ञवालीले यात्रा डेलीसँग भने ।
पर्सामा यसअघि १ सय ४२ जना सुपरिवेक्षकले सूचीकरण गरेको १ लाख १८ हजार ५ सय १५ घरधुरीमध्ये ९३ हजार १ सय ४० घरमा मानिस बस्ने भएको र ती घरका १ लाख ६ सय २१ परिवारको गणना हुने ज्ञवालीको भनाई छ ।
