काठमाडौँ | सत्ता सञ्चालन र गठबन्धनलाई औपचारिक रुपमा अघि बढाउन पाँच दलले समन्वय समिति निर्माण गरेका छन्।प्रधानमन्त्री निवास बालुवाटारमा बसेको पाँच दलको बैठकले गठन्धनलाई मजबुत बनाउन समन्वय समिति गठन गरेको सञ्चारमन्त्री ज्ञानेन्द्रबहादुर कार्कीले जानकारी दिए।समन्वय समिति प्रत्येक दलबाट दुई/दुई जना सदस्य रहने र रोटेसनका आधारमा दुई/दुई महिना संयोजकको भूमिका खेल्ने निर्णय भएको कार्कीले बताए।

समितिमा कांग्रेसबाट वरिष्ठ नेता रामचन्द्र पौडेल र कृष्णप्रसाद सिटौला, माओवादी केन्द्रबाट अध्यक्ष पुष्पकमल दाहाल र नारायणकाजी श्रेष्ठ रहने निर्णय भएको छ।त्यस्तै एकीकृत समाजवादीबाट अध्यक्ष माधव नेपाल र जसपाबाट अध्यक्ष उपेन्द्र यादव रहने छन्। समाजवादी र जसपाले एक एक जना सदस्य सिफारिस गर्न बाँकी रहेको छ।समन्वयन समितिको बैठकमा प्रधानमन्त्री उपस्थित हुने सहमति बनेको छ। पाँच दलको बैठकपछि मन्त्री कार्कीले भने, ‘गठबन्धनको उद्देश्यअनुसार अघि बढ्नका लागि यो समन्वय समिति बनेको हो। यसले जनताको अपेक्षाअनुसार काम गर्छ। यो समन्वयन समिति उपचुनाव र राष्ट्रियसभा चुनावका लागि मात्रै होइन, लामो समय जान्छ।’

यस्तै पाँच दलले आउँदो राष्ट्रियसभा र उपचुवनामा गठबन्धन गर्ने भएका छन्। पाँच दलीय गठबन्धनको बालुवाटारमा बसेको बैठकले राष्ट्रियसभा र उपनुवामा सहकार्य गर्ने निर्णय गरेको हो।आउँदो माघ ५ गतेभित्र राष्ट्रियसभाका २० सिटमा चुनावमा हुँदैछ भने लगत्तै प्रतिनिधिसभाको चार र प्रदेशसभाको रिक्त १८ स्थानमा उपचुनाव गर्ने तयारी सरकारको छ।आजको बैठकमा प्रधानन्यायाधीशबारे छलफल नभएको नेताहरुले बताए।