जनकपुरधाम । नेकपा (माओवादी केन्द्र)का नेता नारायणकाजी श्रेष्ठले गजेन्द्रबहादुर हमालको मन्त्री पदबाट राजीनामा जनताकै भावनाअनुसार भएको बताएका छन् ।
आइतबार जनकपुरधाम आइपुगेका नेता श्रेष्ठले संविधानमा गैरसांसदलाई मन्त्री बनाउने व्यवस्थाअनुरूप बनाइएको भए पनि जनताको ‘म्यान्डेड’अनुसार राजीनामा गर्ने अवस्था आएको उल्लेख गरे ।

“संविधानमा रहेको व्यवस्थाअनुसार गैरसांसदलाई पनि मन्त्री बनाइएको थियो,” उनले भने, “तर, जनताकै भावनाअनुसार दुई दिनमै राजीनामा गर्ने अवस्था आयो ।”
गएको शुक्रबार प्रधानमन्त्री शेरबहादुर देउवाले हमाललाई उद्योग, वाणिज्य तथा आपूर्तिमन्त्रीमा नियुक्त गरेका थिए । जनताको इच्छाविपरीत मन्त्री नियुक्त हुँदा राजीनामा गर्नुपरेको श्रेष्ठको भनाइ छ ।

विभिन्न दलको गठबन्धन मिलेर बनेको सरकारलाई एकापसमा तालमेल मिलाउन समय लाग्ने पनि उनले बताए ।नेता श्रेष्ठ वाईसीएल जिल्ला कमिटी धनुषाले आयोजना गरेको पार्टी प्रवेश कार्यक्रममा सहभागी हुन जनकपुरधाम आएका छन् ।