जनकपुरधाम | जिल्लाको लक्ष्मीनिया गाउँपालिकाले ०७६।७७ मा सफ्टवेयर खरिदबापत ९ लाख ८५ हजार ३ सय ६० रुपैयाँ खर्च गरेको छ।खरिद गरिएको सफ्टवेयरमध्ये ग्रुप एसएमएस पठाउन गाउँपालिकाले ४ लाख ९३ हजार ८ सय १० रुपैयाँ खर्चेको छ। तर, सो सफ्टवेयरबाट १८ जनालाई मात्र एसएमएस गरिएको पाइएको छ। यसरी गाउँपालिकाले एउटा एसएमएस पठाउनका लागि २७ हजार ४ सय ३४ रुपैयाँ खर्चेको हो।

महालेखापरीक्षकको ५८औँ प्रतिवेदनअनुसार पालिकाले सफ्टवेयरमा लाखौँ खर्च गरे पनि काम मेनुअलमै भएको पाइएको हो।सार्वजनिक खरिद नियमावली २०६४ को नियम ७२(२) बमोजिम सार्वजनिक निकायले २० लाख रुपैयाँसमम्मको लागत अनुमान भएको परामर्श सेवा ऐनको दफा ६(क) बमोजिम मौजुदा सूचीमा रहेका सम्भव भएसम्म ६ र कम्तीमा ३ वटा परामर्शदाताबाट लिखित रूपमा प्राविधिक र आर्थिक प्रस्ताव माग गरी खरिद गर्न सकिने व्यवस्था छ।गाउँपालिका जिन्सी व्यवस्थापन, मोबाइल एप्स, ग्रुप एसएमएस तथा योजनाको कामका लागि सफ्टवेयर जडान गर्न ३ फर्मबाट दररेट माग गरी जिन्सी व्यवस्थापन र मोबाइल एप्सबापत जुपिटर टेक्नोलोजीलाई ४ लाख ९१ हजार ५५० र योजना र ग्रुप एसएमएसबापत सिटिजन्स इन्फोटेक्सलाई ४ लाख ९३ हजार ८ सय १० रुपैयाँ भुक्तानी दिएको छ।

पालिकाले एउटै प्रकृतिको सफ्टवेयर एकै पटक खरिद गर्न सकिनेमा टुक्रा–टुक्रा गरी दुई परामर्श दाताबाट खरिद गरेको अनियमित देखिएको महालेखापरीक्षकको कार्यालयले औंल्याएको छ। साथै, पालिकाले खरिद गरेको भनिएका जिन्सी, योजना र मोबाइल एप चालु अवस्थामा छैन।गाउँपालिकाले खरिद गरेका ग्रुप एसएमएस सफ्टवेयरमा २१ जनाको सम्पर्क नम्बर समावेश भएको र १८ वटा एसएमएस पठाइएको प्रतिवेदनमा उल्लेख छ। उक्त सफ्टवेयर अहिले बन्द अवस्थामा छ।महालेखापरीक्षकको प्रतिवेदनले सामान्य मोबाइल प्रयोग गरी गर्न सकिने ग्रुप एसएमएसका लागि सफ्टवेयर जडान गर्नुको औचित्य नरहेको बताएको छ।