जिल्ला प्रहरी कार्यालय कालिकोटका प्रमुख डिएसपी श्यामबाबु ओलीयाले साँगुरो कर्णाली राजमार्गका अधिकांश ठाँउहरुमा दुईवटा गाडीलाई क्रस गर्न आधा किलोमिटरसम्म ब्याग जानुपर्ने, सडक मर्मत सुधार नहुँदा ठाँउ ठाँउमा खाल्डा खुल्डी परेको, बढी दुर्घटना हुन सक्ने जोखिमयुक्त सडक भएकाले राति १० बजेपछि यातायात सेवा बन्द गरिएको जानकारी दिए।
दुईवर्ष अगाडिसम्म कर्णाली राजमार्गमा राति ७ बजेपछि सवारी साधन संचालनमा रोक लगाइएको थियो। मुलुक नयाँ संरचनामा गएसंगै बनेको कर्णाली प्रदेश सरकारले कर्णाली राजमार्गमा २४ सै घण्टा यातायात गुड्न दिने निर्णय गरेपछि २०७५ साल असोजदेखि कर्णाली राजमार्गमा २४ सै घण्टा यातायात सेवा संचालन गरिएको हो। प्रहरीले पुन सडक दुर्घटनाको जोखिमका कारण राति १० बजेपछि राजमार्ग बन्द गरेको हो। प्रहरी प्रमूख डिएसपी ओलीले दसैं र तिहारलाई लक्षित गरी कर्णालली राजमार्गमा राति १० बजेपछि सवारी आगमन बन्द गरिएको हो। उनले यो नियमलाई निरन्तरता दिने बताए। उनले भने, ‘राजमार्ग नै जोखिमयुक्त रहेकाले सधैं राति १० बजेपछि सवारी साधनहरुलाई चल्न रोक लगाउने निर्णय गरेका छौँ।’
कर्णाली राजमार्गमा गाडीको चाप बढेको छ। नेपालकै चर्चित पर्यटकीय क्षेत्र मुगुमा रहेको रारा तालका कारण कर्णाली राजमार्गमा गुड्ने गाडीको चाप बढेको हो।
जिल्ला ट्राफिक कार्यालय कालिकोटका अनुसार सधैंजसो नियमित रुपमा कर्णाली राजमार्गमा गुड्ने गाडीहरु दैनिक रुपमा ४५ देखि ५० सम्म कार्यालयमा इन्ट्री हुन्थ्ये। तर आज भोलि राराको सिजन सुरु भएपछि त्यो संख्या ह्वात्तै बढेर १ सय २० सम्म पुगेको छ।
जिल्ला ट्राफिक कार्यालयका अनुसार असोज महिना लागेसँगै प्रतिदिन न्यूनतम १ सयदेखि १ सय २० सम्म गाडीहरु इन्ट्री भएका छन्। यसरी हेर्दा प्रति दिन ५० देखि ६५ सम्म नयाँ गाडीहरुको आगमन भएको छ। जुन गाडीमा सवार प्रति गाडी सरदर १० जनाले मात्र पनि दैनिक एक हजारदेखि १ हजार ३ सयसम्म आन्तरिक तथा बाह्य पर्यटकहरुको आगमन बढेको छ। दैनिक रुपमा ८०∕९० वटा नयाँ बाइकहरु राजमार्गमा गुड्न थालेका छन्।
