जनकपुर | जनकपुरधाम उपमहानगरपालिका–४ बसहिया रोडमा रहेको स्वस्तिक इङ्ग्लिस बोर्डिङ्ग स्कूलका शिक्षिका र शिक्षकको कुटाइबाट एक विद्यार्थीको हात भाँचिएको छ।शिक्षिका शोभा साह र शिक्षक रब्बानी हुसैनले कक्षा ४ मा अध्ययनरत सिद्धार्थ ठाकुरमाथि निर्घात कुटपिट गरेका हुन् । कुटपिटबाट १२ वर्षीय बालक ठाकुरको हात भाँचिएको छ ।

बालक ठाकुरका पिता जितेन्द्र ठाकुर सोनारले आफ्नो छोराले गृहकार्य नगरेको भन्दै साह र हुसैनले वाइरिङ्ग गर्ने पाइपले पिट्दा हात भाँचिएको जानकारी फरकधारलाई दिए । कुटाइबाट गम्भीर चोट लागेका बालक ठाकुरको विद्यालय नजिकैको औषधि पसलमा सामान्य उपचारपछि हाडजोर्नी तथा नशा रोग विशेषज्ञ डा. रामविनय चौधरीसँग थप उपचार गराइएको बुबा जितेन्द्रले जानकारी दिए ।

‘मेरो छोरो पढाइमा पनि राम्रै थियो, बानी बेहोरा पनि राम्रै छ,’ उनले भने, ‘मैले त छोरोलाई पढ्न पठाएको हो, तर हात भाँचेर घर फर्कंदा मन दुख्यो ।’ स्कुलमा यसरी अमानवीय तरिकाले विद्यार्थीलाई कुटपिट गर्नु कानूनी र सामाजिक अपराध रहेको उनले बताए । विद्यार्थीका अभिभावकले स्कुलको अबिलम्ब दर्ता खारेज र कुटपिट गर्ने शिक्षकमाथि कारबाही तथा उपचार खर्च उपलब्ध गराउन माग गरेका छन् ।

बालक ठाकुरलाई कुटपिट गर्ने शिक्षिका विद्यालयका प्रधानाध्यापक श्याम सुन्दर साहाकी पत्नी हुन् ।यस सम्बन्धमा स्कुलका प्रधानाध्यापक श्याम सुन्दर साहले विद्यार्थीले गृहकार्य नगरेकोले शिक्षकले सामान्य कुटपिट गर्दा संयोगवश विद्यार्थीको हात भाँचेको प्रतिक्रिया दिए । उनले उनको सबै उपचार खर्च तिर्न विद्यालय तयार रहेको समेत बताए ।उनले विद्यार्थीमाथि निर्घात कुटपिट गरिएको कुरा अस्वीकार गरे । उनले शिक्षकले विद्यार्थीलाई हप्काएको हुन सक्ने तर, कुटपिट नभएको बताए । कुटपिट गरेको भनिएको शिक्षकलाई आफूले बोलाएर घटनाबारे बुझ्ने जानकारी दिए ।