जनकपुरधाम । संस्कृतिविद् रामभरोस कापडि़ले संस्कार गीतलाई पाठ्यक्रममा समावेश गरी अध्ययन – अन्वेषण गराउनु पर्ने तर्क गरेका छन् ।सखी बहिनपा मैथिलानी समूहको स्थापना दिवसका अवसरमा मंगलबार जनकपुरधाममा आयोजित मैथिली सोहर (जन्म गीत) प्रतियोगितामा पुरस्कार प्रदान गर्दै उनले संस्कार गीत आधुनिकताबाट अतिक्रमित हुँदै गएको प्रति चिन्ता व्यक्त गरे । संस्कार जीवन पद्धति भएकाले यसको संरक्षण, विकास र रक्षाबाट नै जीवनको स्पष्टता हुन सक्ने प्रसङ्ग उल्लेख गर्दै संस्कृतिविद् कापडि़ले लोप हुन लागेको संस्कार गीतलाई पुस्तामा हस्तान्तरण गर्ने अभियानप्रति सजग हुनु जरूरी रहेको बताए । ग्रामीण क्षेत्रमा गाइने जन्मदेखि मृत्युसम्मका संस्कार गीतको सङ् कलन र पुस्तक प्रकाशन गर्नु पर्ने खाँचौं औल्याउदै उनले भने ,“ लोप हुन लागेका संस्कार गीतको संरक्षण आवश्यक छ ।

” नेपाल वार एसोसिएसनका केन्दीय सदस्य श्यामकुमार मिश्र संस्कार गीतलाई लोप हुनबाट बचाउन मैथिलानी सजग हुनु जरूरी रहेको बताए । नारी शक्ति संगठित र सजग भएमा मिथिलाको संस्कृति कहिल्यै पनि लोप हुन नसक्ने धारणा उनले राखे । साहित्यकार श्मामसुन्दर शशिले संस्कार गीत अनमोल खजाना भएकाले यसलाई पुस्तामा हस्तान्तरण गरी संरक्षण गर्ने दायित्व सबैको भएको बताए । सखी बहिनपाका अभियानीहरू भारती चौधरी , पुनम झा मैथिल र बिन्दु ठाकुरले सखी बहिनपा समूह भाषा , सभ्यता , संस्कृति , कला , उद्यमको रक्षामूलक अभियान स्थापनाकाल देखि नै गर्दै आएको जानकारी दिए ।

सखी बहिनापाका अभियानी सुनिता मिश्रको अध्यक्षतामा भएको सो प्रतियोगितामा मीरा पाठक प्रथम , मोती झा द्वितीय र रिता मल्लिक तृतीय तथा सलोनी साह , चन्द्रकला राउत , रूक्का मिश्र , मीना ठाकुर , शिल्पी मिश्र , नमिता ठाकुर , डा. गायत्री झाले सान्त्वना पुरस्कारबाट पुरस्कृत भइन् । कलाकारहरू नवीन मिश्र र संगीता देव तथा साहित्यकार श्यामसुन्दर शशि निर्णायक रहेको सो प्रतियोगितामा कलाकार पूर्णकला मिश्र ,संगीता देव , प्रियाशा चौधरीले अप्रतियोगी संस्कार गीत प्रस्तुत गरेकी थिइन् ।सो अवसरमा अरूणा मिश्र, बिन्दु ठाकुर , भारती चौधरी , सुनिता मिश्र र पुनम झा मैथिलद्वारा गाइएको “ पाँच सोहागिन ” नामक वैवाहिक संस्कार गीतको एलबम पनि सार्वजनिक गरिएको थियो ।