मकवानपुर | मकवानपुरको बकैयामा एक युवकको शव फेला परेको छ । शनिबार दिउँसो करिब ३ बजेको समयमा बकैया गाउँपालिका वडा नम्बर–११ नियाले भञ्ज्याङस्थित श्रीडाँडा जङ्गलमा शव फेला परेको जिल्ला प्रहरी कार्यालय मकवानपुरले जानकारी दिएको छ ।

जङ्गलमा लडिरहेको अवस्थामा मकवानपुरगढी गाउँपालिका वडा नम्बर–१ जैरेटार बस्ने अन्दाजी २८ वर्षका मानबहादुर लुङ्वाको शव फेला परेको जिल्ला प्रहरी कार्यालय मकवानपुरका प्रहरी नायव उपरीक्षक जयश्वर रिमालले जानकारी दिए ।शव फेला परेको जानकारी पाए लगत्तै जिल्ला प्रहरी कार्यालय मकवानपुरबाट प्रहरी निरीक्षक कमाण्डमा घटनास्थलमा प्रहरी टोली पठाइएको र प्रहरी टोलीले अनुसन्धान कार्य सुरु गरिसकेको उनले बताए ।

प्रहरी टोलीले हाल घटना र घटनास्थलको बारेमा प्रारम्भिक अनुसन्धानको कार्य र मुचुल्का उठाउने काम गरिरहेको उनको भनाई छ । मुचुल्का उठाएर मृतक लुङ्वाको शवलाई पोष्टमार्टमका लागि हेटौँडा अस्पतालमा ल्याइने उनले बताए ।घटनाबारे तत्काल यसै भन्न नसकिने भन्दै आवश्यक अनुसन्धान पश्चात् जानकारी दिने प्रहरी नायब उपरीक्षक रिमालले बताए ।