बीरगन्ज | जिल्ला प्रशासन कार्यालय पर्साले मास्क नलगाई आउने सेवाग्राहीलाई कार्यालयको गेटबाटै फिर्ता गर्न सम्बन्धित सरकारी कार्यालयहरूलाई निर्देशन दिएको छ ।पर्सामा कोरोना संक्रमण नियन्त्रणमा भए पनि अन्य जिल्लामा फैलिने क्रम सुरु भई सकेको हुँदा मास्कलाई अनिवार्य पहिलो सर्तको रुपमा अपनाउन सरकारी कार्यालयमा आउने सेवाग्राहीले अनिवार्य रुपमा मास्क लगाउनुपर्ने प्रावधान लागु गरिएको पर्साका सहायक प्रमुख जिल्ला अधिकारी एवं प्रवक्ता भिमकान्त पौडेलले बताउनुभयो ।
उहाँले वीरगंजलगायत प्रत्येक पालिकालाई मास्क नलगाई सार्वजनिक स्थलमा हिँडडुल तथा आवतजावत गर्नेलाई पहिला मास्क लगाउन आग्रह गर्ने र अटेरी गर्नेलाई कारबाही गर्न समेत निर्देशन दिएको बताउनुभयो ।वीरगंज नगर क्षेत्रमा अहिले विभिन्न सामाजिक सङ्घ संस्थाहरूले मास्क अभियान सञ्चालन गरेका छन् ।मास्क हुनेले लगाउने, नहुनेलाई दिने अभियान सुरु गरिएको ग्रिन सिटी सामुदायिक केन्द्रका अध्यक्ष जय प्रकाश खेतानले बताउनुभयो ।
जिल्ला प्रशासन कार्यालयले मास्क नलगाई प्रशासन कार्यालय आउने सेवाग्राहीलाई सुरक्षाकर्मी नै खटाएर गेटबाट फिर्ता पठाएको बताउँदै सबै सरकारी कार्यालयहरूले मास्क अभियानलाई अनिवार्य सर्तको रुपमा लागु गरे कोरोना संक्रमण नियन्त्रणका लागि प्रभावकारी हुने जिल्ला प्रशासन कार्यालय पर्साका प्रवक्ता पौडेलले बताउनुभयो ।
बीरगंजबाहेक पर्साका अन्य १३ वटा पालिकामा मास्क लगाउने अभियान सञ्चालन हुन नसकेको र यसमा स्थानीय पालिकाहरूले लापरबाही गरेको भेटिएको हुँदा सम्बन्धित पालिकाहरूलाई समेत गराइएको प्रवक्ता पौडेलले बताउनुभयो ।संक्रमण रोग ऐन अन्तरगत अटेरी गर्नेलाई कारबाही गर्ने, अनुगमन गर्ने लगायतका सबै अधिकार स्थानीय तहलाई हुँदा समेत स्थानीय तहले लापरबाही गर्दा आगामी दिनमा कोरोना संक्रमण फैलिने देखिएको छ ।
