बिरगंज।रुपर्ट मर्डोखका मिडिया आउटलेटहरुमा जलवायु विज्ञानलाई दबाइएको भन्दै एक पादरीले आफ्नो मुख सिलाएर विरोध प्रदर्शन गरेका छन्। ७१ वर्षीय ‘रेभरेन्ड’ टिम हेवेसले लण्डनस्थित न्युज यूकेको कार्यालय बाहिर सांकेतिक रुपमा प्रदर्शन गरेका हुन्।
युट्युबमा पोस्ट भएको एक भिडियोमा हेवेसले मर्डोखलाई ‘जलवायु परिवर्तनलाई इन्कार गर्ने’ व्यक्ति भनेका छन्। उनले मिडिया मालिक मर्डोखको सरकारमा पनि उच्च प्रभाव रहेको भन्दै त्यसकारण सरकार जलवायु संकटमा अर्थपूण कदम चाल्नबाट चुकेको बताए।
पूर्व डेन्टिस्ट समेत रहेका अक्सफोर्डको डिओसिसस्थित चर्च अफ इङल्याण्डका पादरी हेवेससँगै ६२ वर्षीय ‘रेभरेन्ड’ मार्क कोलमेन समेत रहेका छन्। कोलमेनले आफूलाई भेट्न र कुराकानी गर्न भन्दै ‘द टाइम्स न्युजपेपर’का वातावरण सम्पादकलाई पत्र समेत बुझाएका थिए।
प्रदर्शनको पछाडि को छ?
‘रेभरेन्ड’ क्रिस्चियन क्लाइमेट एक्सनसँग सम्बन्धित छन्, जुन ‘एक्सटिङ्सन रिबेलियन’ नामक जलवायु आन्दोलनको एउटा शाखा हो। सो समूहले २३ अगस्टदेखि प्रदर्शन गर्ने तयारी गरेको छ, जसलाई ‘द इम्पोसिबल रिबेलियन’ नाम दिइएको छ।
जलवायुसम्बन्धी प्रदर्शनमा हेवेस अपरिचित व्यक्ति भने होइनन्। उनले यसअघि सोही समूहबाट लण्डनस्थित अदालतको फर्निचरमा आफैँलाई ‘ग्लु’ लगाएको टाँसेका थिए। जसको लागि उनले मार्च २०२० मा १४ दिन जेस समेत बस्नु परेको थियो।
हेवेसले किन मुख सिलाए र उनी के चाहन्छन्?
मुख सिलाउने कार्यलाई हेवेसले सांकेतिक रुपमा आवाज नसुनिएकाहरुको ‘निराशाको प्रतीक’ भनेका छन्।
‘विश्वमा धेरै यस्ता मानिसहरु छन् जो आवाजविहीन छन् र उनीहरुले जलवायु संकटका कारण कष्ट भोगिरहनु परेका छ’, हेवेस भन्छन्, ‘जलवायु विज्ञान र सत्यलाई दबाइएको छ, र कष्ट भोगिरहेकाहरुको आवाज पनि सुनिएको छैन। रुपर्ट मर्डोखले यस्तै गरेका छन्। जलवायु विज्ञानलाई दबाउन उनी आफ्नो मुख सिलाए जसरी बसेका छन्।’
‘मर्डोखको कदमले विश्वमा परेको भयानक र हिंसात्मक कहरको विरुद्ध प्रदर्शन गर्न मैले आफ्नो मुख सिलाएको हो। यसले सांकेतिक रुपमा यो सत्यलाई बाहिर पनि ल्याउने छ,’ उनले थपे।
मर्डोखको ध्यान केन्द्रित गर्नु आफ्नो उद्देश्य रहेको उनले बताएका छन्। मर्डोखले ‘प्रमाणमा आधारित, संसारभरका प्रख्यात वैज्ञानिकहरुले पुष्टि गरेको वैज्ञानिक अवलोकन’लाई दबाएको उनको आरोप छ।
हेवेसले ‘मर्डोख – संसारकै इतिहासमा सबैभन्दा विनाशकारी मान्छे’ लेखिएको प्लेकार्ड बोकेको फोटोमा देखिएको छ।
दुई घण्टा पछि उनले आफ्नो प्रदर्शन सक्दै मुखमा लगाएको स्टिच खोलेका थिए।
को हुन् रुपर्ट मर्डोख?
मर्डोख अष्ट्रेलियामा जन्मिएका अमेरिकी व्यवसायी हुन्। उनी सयौँ राष्ट्रिय तथा अन्तर्राष्ट्रिय मिडियाका मालिक पनि हुन्। उनी ‘द सन’, ‘द टाइम्स’, ‘फक्स न्युज’, ‘द वाल स्ट्रिट जर्नल’ जस्ता मिडियाका प्रमुख रहेका उनले ग्लोबल मेनस्ट्रिम मिडियाको लागि सम्पादकीय तय गर्ने गर्छन्।
२०२१ मा २२.४ बिलियन डलर नेटवर्थ रहेका उनी अमेरिकाका ३१ औँ र संसारका ७१ औँ धनी व्यक्ति हुन्। २०२० को नोभेम्बरमा मर्डोखले न्युज कोर्पका सेयरधनीहरुसँगको अर्चुअल वार्षिक सभामा कम्पनीले जलवायु परिवर्तनलाई इन्कार नगर्ने बताएका थिए। तर, वातावरणसँग सम्बन्धित रिपोर्टहरुमा उनको मिडियाको व्यापक आलोचना हुने गरेको छ।
