वीरगञ्ज । इलाका प्रहरी कार्यालय पोखरियाले ५ महिनादेखि फरार अभियुक्तलाई पक्राउ गरेको छ । अवैध लागु औषध ८ किलो ५० ग्राम अफिम बिक्री गरेको आरोपमा करिब ५ महिनादेखि फरार रहेका पर्साको पटेर्वासुगौली गाउँपालिका वडा नम्बर १ सोनवर्षा निवासी ५३ वर्षीय अमजद मियाँलाई प्रहरीले पक्राउ गरेको हो ।

पर्साको कालिकामाई गाउँपालिका वडा नम्बर १ तिनडोबियाबाट २०७७ असोज २० गते इलाका प्रहरी कार्यालय पोखरियाको टोलीले ८ किलो ५० ग्राम अफिम बरामद गरेको थियो । सोही ठाउँका मेनेजर राउत कुर्मीको धान खेतमा सेतो प्लाष्टिकको झोलाबाट ८ किलो र स्थानीय खोभारी प्रसादको घरको सोफामुनि कपडामा बाँधेर राखिएको अवस्थामा ५० ग्राम अफिम फेला परेपछि अनुसन्धानको क्रममा खोभारीका बुबा गम्भिरा राउत कुर्मी, सोही टोलका सैमुल्लाह भनिने मरफि मियाँ र नजिर आलम पनि घटनामा संलग्न भएको प्रहरीले जनाएको छ ।

भारतीय तस्करको लगानीमा योजनाबद्ध रुपमा अमजदसँग अफिम खरिद गरेको उनीहरुको बयानपछि खोजी गर्ने क्रममा फरार रहेका अमजदलाई पक्राउ गर्न सफल भएको इलाका प्रहरी कार्यालय पोखरियाका प्रहरी निरीक्षक दीपक थापाले जानकारी दिए ।थापाका अनुसार सोमबार दिउँसो सोनवर्षामै लुकीछिपी बसको अवस्थामा अमजद पक्राउ परेका हुन् । घटनामा संलग्न भनिएका भारतमा नै लुकेर बसेका फरार अभियुक्तहरुको भारतीय प्रहरीसँगको समन्वयमा खोजी भइरहेको जिल्ला प्रहरी कार्यालय पर्साले जनाएको छ ।