वीरगञ्ज । दोस्रो लहर नसकदै अब वीरगञ्जमा कोभिडसँग मिल्दो जुल्दो संक्रमण इन्फ्लुएन्जा ए भएको पुष्टी भएको छ । राष्ट्रिय जनस्वास्थ्य प्रयोगशाला टेकुमा केहि नमुना परीक्षण गराउँदा वीरगञ्जमा इन्फ्लुएन्जाको संक्रमण फैलिएको पुष्टी भएको हो ।नारायणी अस्पतालका डाक्टर सरोज रोशन दासका अनुसार वीरगञ्जबाट ५ जनाको स्वाब नमुना परीक्षण गराउँदा ४ जनामा इन्फ्लुएन्जा ए एचथ्री पोजेटिभ देखिएको जानकारी दिए ।

वीरगञ्जबाट २१ वर्षका ३ जना महिला, २५ वर्षकी महिला र २७ वर्षीय पुरुषको स्वाब नमुना परीक्षणका लागि पठाईएको थियो । उनीहरुको राष्ट्रिय जनस्वास्थ्य प्रयोगशालामा गरिएको कोरोना परीक्षण रिपोर्ट पनि नेगेटिभ नै आएको छ । संक्रमितहरु उपचारपछि अहिले ठिक भईसकेका छन् ।
विश्व स्वास्थ्य संगठनका जनकपुर कार्यालयका प्रतिनीधिसँगको समन्वयमा पहिला कोभिड टेष्टका लागि लिएको स्वाब नमुना नै टेकु पठाईएको थियो ।’ उनले भने ‘ ५ जना मध्ये ४ जनामा इन्फ्लुएन्जा ए एचथ्री पोजेटिभ देखिएको छ ।’

विश्व स्वास्थ्य संगठनको जनकपुर कार्यालयले धनुषाबाट समेत दुईवटा स्वाब नमुना परीक्षणका लागि पठाएका थिए । धनुषाबाट पठाईएको स्वावमा भने इन्फ्लुएन्जा बी भिक्टोरियाको संक्रमण देखिएको छ ।नमुना परीक्षण रिपोर्टबाट वीरगञ्जमा इन्फ्लुएन्जा ए एचथ्रीको संक्रमण फैलिसकेको अनुमान गर्न सकिने नारायणी अस्पतालका भाईरोलोजिष्ट डाक्टर प्रभाकर पाण्डे बताउँछन् ।

‘पहिला पनि विश्वमै इन्फ्लुएन्जाले महामारीको रुप लिईसकेको हो, अहिले वीरगञ्जमा ज्वरोे आउने, खोकी लाग्ने, कमजोरी हुने लक्षण देखिएका विरामीहरु अस्पतालमा आईरहेका छन्, पीसीआर परीक्षण गराउँदा रिपोर्ट नेगेटिभ आईरहेको छ ।’ उनले भने ‘ कोरोना जस्तै यो पनि स्वास प्रश्वाससँगै सम्बन्धित रोग हो, रोगसँग लड्ने क्षमता कमजोर भएकालाई बढी असर गर्छ ।’इन्फ्लुएन्जाबाट बच्नका लागि पनि भिडभाडमा कम जाने, मास्क लगाउने, सामाजिक दुरी कायम गर्ने, सेनिटाईजर प्रयोग गर्ने वा साबुन पानीले समय समयमा हात धुने जस्ता स्वास्थ्य सुरक्षाका उपाय अबलम्बन गर्नुपर्ने उनको भनाई छ ।

‘भाईरसहरू सम्पर्क, बूँद र फोमाइट्सबाट एक व्यक्तिबाट अर्को व्यक्तिमा सर्छन, कोरोना भाईरसको संक्रमणबाट बच्न अपनाउँदै आएका उपायहरु हतको स्वच्छता, राम्रो श्वासप्रश्वासको शिष्टाचार (खोक्दा वा हाँछ्यु गर्दा कुहिना, रुमाल वा टिस्युले छोपेर गर्ने, टिस्युलाई तत्काल सुरक्षित डिस्पोज गर्ने) नै महत्वपूर्ण छ ।’ उनले भने ‘इन्फ्लुएन्जासँग मिल्दोजुल्दो लक्षण देखिएपछि चिकित्सकसँगको परामर्शमा औषधी सेवन गर्दा आउन सक्ने थप जोखिमबाट बच्न सकिन्छ ।’

नारायणी अस्पतालको आकस्मिक विभाग प्रमुख एवं कोभिड संयोजक डाक्टर उदय नारायण सिंहका अनुसार दैनिक ५० को हाराहारीमा कोभिडसँग जुल्दो लक्षण देखिएका विरामी अस्पतालमा आउने गरेका छन् । नीजि क्लिनिकहरुमा उपचारका लागि आउने ३० प्रतिशत विरामीमा ज्वरो हुने गरेको छ ।

‘ ५ जनाको नमुना परीक्षण गराउँदा ४ जनामा इन्फ्लुएन्जा देखिएपछि अब थप स्वाब नमुना संकलन गर्ने सोच बनाएका छौं ।’ डाक्टर सिंहले भने ‘ वीरगञ्जमा कोरोना परीक्षण गर्ने र इन्फ्लुएन्जा लगायत थप अन्य परीक्षण गर्नका लागि नमुना बाहिर पठाउँछौं ।’नेपालमा इन्फ्लूएन्जाका लागि चिकित्सकले प्रभावकारी एन्टीभाईरल औषधीहरु चलाउने गरेका छन्, तर यस विरुद्ध खोपहरू पनि उपलब्ध छन् ।

स्वास्थ्य निर्देशनालय प्रदेश नं २ का निर्देशक विजय कुमार झाले भने अहिले भाईरसबाट संक्रमण हुने विभिन्न ‘सिजनल फ्लु’ देखिने मौसम नै भएको बताए । ‘ अहिले सिजनल फ्लु बढेको छ, परीक्षण गराउँदा विभिन्न भाईरसको संक्रमणबाट लाग्ने रोगका संक्रमित भेटिन सक्न्छन् ।’ उनले भने ‘ दुई चारवटा केस आउँदैमा महामारी नै आएको मान्न हुँदैन, आउटब्रेक भएको हो वा होईन परीक्षण गर्नुपर्छ ।’