जनकपुरधाम । प्रदेश २ का मुख्यमन्त्री लालबाबु राउतले अगामी आर्थिक वर्षको बजेटमा त्रुटि स्वीकार गर्दै सच्याउने प्रतिवद्धता जनाएपछि प्रदेशसभा बैठक सुचारु भएको छ ।
प्रतिपक्षी नेकपा एमाले र नेकपा माओवादी केन्द्रले निरन्तर संसद अवरुद्ध गर्न थालेपछि प्रदेशसभा बैठकमा मुख्यमन्त्रीले जवाफ दिँदै बजेट सच्याउने प्रतिवद्धता जनाएका हुन् । उनले भने, ‘आवश्यक समन्वय अभावमा बजेटमा सबैको आकांक्षा बमोजिम योजनाहरु समावेश भएको छैन । म विश्वास दिलाउन चाहन्छु कि मन्त्रीपरिषदबाट सुधार गर्छौ ।’
बजेटमा करिब साढे ५ अर्ब रुपैयाँ अबण्डा रकम राखिएको विषयमा उनले पारदर्शी रुपमा बण्डा गरिने बताए । ‘अबण्डा रकम गलत ढंगले वितरण गरिने छैन’ उनले प्रतिपक्षी दललाई विश्वास दिलाए । उनले बजेट सर्वसम्मत रुपमा पास गर्न पनि अनुरोध गरेका छन् ।
मुख्यमन्त्री राउतले संसद पुनःस्थापना गर्ने अदालतको फैसलालाई सदनमै स्वागत समेत गरे ।
