बिरगंज । भागबण्डा नमिल्दा पर्साका सात स्थानीय तहले हालसम्म पनि बजेट ल्याउन सकेका छैनन्। पर्सामा रहेका १४ वटा स्थानीय तहमध्ये सात वटा स्थानीय तहले हालसम्म पनि अगामी आर्थिक वर्ष २०७८/७९ को बजेट ल्याउन नसकेका हुन्।

जिल्लाको ठोरी गाउँपालिका, जगरनाथपुर, धोबिनी, कालिकामाई, बिन्दबासिनी, जिरा भवानी र पटेर्वा सुगौली गाउँपालिकाले हालसम्म बजेट ल्याएका छैनन्। स्थानीय तह सञ्चालन ऐन अनुसार असार १० गतेभित्र बजेट ल्याइसक्नु पर्छ। तर, यहाँका स्थानीय तहहरुमा भागबण्डा र जनप्रतिनिधिहरुको आपसी मनमुटावले बजेट समयमै आउन सकेको छैन।

हालसम्म पनि बजेटको पर्याप्त तयारीसमेत नगर्नुको मुख्य कारण पालिकाहरुमा जनप्रतिनिधिहरुबीचको मनमुटाव, बजेटमा भागबण्डा नमिल्नु र केही पालिकाहरुमा प्रमुख र प्रमुख प्रशासकीय अधिकृतबीचको विवाद रहेको जनप्रतिनिधिहरु नै बताउँछन्।

गाउँपालिकाका अध्यक्ष र प्रमुख प्रशासकीय अधिकृतको कुराकानी नमिल्दा नै समयमा बजेट ल्याउन नसकिएको धोबिनी गाउँपालिकाका उपाध्यक्ष पारसप्रसाद कुर्मीले जानकारी दिए। पछिल्लो दुई महिनादेखि अध्यक्ष र प्रशासकीय अधिकृतबीच विवाद चलिरहेकोले विकासको काम पनि ठप्प रहेको र बजेट पनि ल्याउन नसकिएको कुर्मीले बताए।

‘हाम्रो गाउँपालिकाका अध्यक्ष र अधिकृतबीच दुई महिनादेखि विवाद चलिरहेकोे छ,’ उनले भने, ‘त्यही विवादका कारण अधिकृतको सरुवा गराउन अध्यक्ष दुई महिनादेखि काठमाडौँमै छन्, अनि बजेट पनि ल्याएका छैनन्।’

गाउँपालिकामा पहिलेदेखि नै विकासको काममा ध्यान नदिइएको तथा बजेटमा व्यापक रुपमा अध्यक्ष र प्रशासकीय अधिकृतको मिलेमतोमा भ्रष्टाचार भएको आरोप कुर्मीको छ। बजेट ल्याउन अध्यक्षले निकै हारगुहार गरेको तर, आफूसहितका जनप्रतिनिधिले त्यसमा विरोध जनाएको उनको भनाइ छ।

समयमै बजेट ल्याउन आफूले माग गरेको भएपनि गाउँपालिका अध्यक्ष र प्रमुख प्रशासकीय अधिकृतले कोभिडको बहाना बनाएर समयमै बजेट नल्याएको पटेर्वा सुगौली गाउँपालिकाकी उपाध्यक्ष ममता महतो थारुले बताइन्। अगामी असार २४ गते भने बजेट नीति तथा कार्यक्रम ल्याउन बैठक डाकिएको उनको भनाइ छ।

‘हामीहरुले बजेट ल्याउन माग गरेपनि गाउँपालिका अध्यक्ष र प्रशासकीय अधिकृतकै कारणले समयमा बजेट आउन नसकेको हो’, उनले भनिन्, ‘अगामी असार २४ गते नीति तथा कार्यक्रम ल्याउने बैठक राखिएको छ, त्यसपछि गाउँसभा गर्ने तयारी छ।’

बजेटको तयारी अन्तिम चरणमा रहेको भन्दै अगामी आर्थिक वर्षको बजेट सकेसम्म छिटै ल्याउने कालिकामाई गाउँपालिकाका कार्यवहाक अध्यक्ष राजेश रौनियारले जानकारी दिए। बजेटको लागि चाहिने सबै कुराहरुको तयारी भइरहेकोले छिटै गाउँपालिकाले गाउसभामार्फत बजेट सार्वजनिक गर्ने उनको भनाइ छ।

पर्साका १४ मध्ये बाँकी सात स्थानीय तहहरुले असार १० गतेभित्र नै अगामी आर्थिक वर्षको बजेट सार्वजनिक गरिसकेका छन्। वीरगञ्ज महानगरपालिका, पर्सागढी नगरपालिका, बहुदरमाई, पोखरिया, सखुवा प्रसौनी गाउँपालिका, छिपहरमाई र पकहा मैनपुर गाउँपालिकाले बजेट ल्याइसकेका छन्।राम मण्डल